मांडवगण फराटा (पुणे) : शिरूर तालुक्यातील बाभूळसर बुद्रुक येथे कोरोना विषाणूचा संसर्ग झालेला एक तरुण सापडला आहे. 

हा  कोरोनाबाधित तरुण कारेगाव औद्योगिक वसाहतीतील एका खासगी कंपनीत काम करीत आहे. तो बाभूळसर बुद्रुक येथून दररोज आपल्या कामाच्या ठिकाणी ये जा करीत होता. त्याचे अहवाल हे पॉझिटीव्ह आल्याने मांडवगण फराटा येथील प्राथमिक आरोग्य केंद्राच्या वैद्यकीय अधिकारी डॉ. मंजुषा सातपुते-इसवे यांनी त्यांच्या संपर्कात आलेल्या कुटुंबातील सदस्यांना होम क्वारंटाईन केले आहे. या तरुणावर लोणी काळभोर येथील विश्वराज हॉस्पिटलमध्ये उपचार सुरू आहेत.

पुण्याच्या इतर बातम्या वाचण्यासाठी येथे क्लिक करा

याबाबत मांडवगण फराटा येथील प्राथमिक आरोग्य केंद्राच्या वैद्यकीय अधिकारी डॉ मंजुषा सातपुते यांनी सांगितले की, कोरोनाबाधित रुग्ण जरी सापडला असला, तरी नागरिकांनी घाबरून जाऊ नये. अफवा पसरू देऊ नका. तसेच, अफवांवर विश्वास ठेवू नका. नागरिकांनी गर्दीच्या ठिकाणी जाताना, तसेच घराबाहेर पडताना सोशल डिस्टंसिंग यांचा अवलंब करत मास्क, सॅनिटायझर यांचा वापर करावा.