पुणे : पुणे आरटीओ कार्यालयाच्या प्रादेशिक परिवहन अधिकारीपदी अर्चना गायकवाड यांची नियुक्ती झाली आहे. परिवहन विभागाने गुरुवारी (ता. १३) सायंकाळी त्यांच्या नियुक्तीचा आदेश काढला. राज्यातील सर्व आरटीओ अधिकाऱ्यांची पदोन्नतीचा आदेश सहा जून रोजी निघाला होता. मात्र पुणे व चंद्रपूर कार्यालयाचा आदेश निघत नसल्याने आरटीओ वर्तुळात उलट सुलट चर्चांना उधाण आले होते. गुरुवारी अखेर अर्चना गायकवाड यांच्या नावावर शिक्कामोर्तब झाले.

राज्यातील आरटीओ कार्यालयांपैकी महत्त्वाचे व सर्वाधिक उत्पन्न मिळवून देणारे कार्यालय म्हणून पुणे आरटीओ कार्यालय ओळखले जाते. त्यामुळे या कार्यालयाचा पदभार घेण्यासाठी अधिकाऱ्यांमध्ये रस्सीखेच सुरू असते.

जळगावचे उप प्रादेशिक परिवहन अधिकारी श्याम लोही यांचे नाव पुणे आरटीओपदी जवळपास निश्चित मानले जात होते. मात्र अकलूज येथे उप प्रादेशिक परिवहन अधिकारी या पदावर कार्यरत असलेल्या अर्चना गायकवाड यांनी अखेर यात बाजी मारली. श्याम लोही यांची नियुक्ती चंद्रपूर येथील आरटीओ कार्यालयात प्रादेशिक परिवहन अधिकारी या पदावर करण्यात आली आहे.

स्वप्नील भोसले नवे उप प्रादेशिक अधिकारी

स्वप्नील भोसले यांची उप प्रादेशिक परिवहन अधिकारी, पुणे या पदावर नियुक्ती झाली. गुरुवारी त्यांनी पदभार स्वीकारला. भोसले यांनी यापूर्वी यवतमाळ येथे सहाय्यक प्रादेशिक परिवहन अधिकारी म्हणून काम केले आहे, तसेच परिवहन आयुक्त कार्यालय मुंबई येथे सहाय्यक परिवहन आयुक्त म्हणूनदेखील काम केले आहे.