अर्जुन पुरस्कार विजेते माजी बॅडमिंटनपटू नंदू नाटेकर यांचं पुण्यात वृद्धफकाळाने निधन झालं आहे. ते 88 वर्षाचे होते. 1961 मध्ये सुरु झालेला अर्जुन पुरस्कार पहिल्यांदा प्राप्त करण्याचा मान नंदू नाटेकर यांना मिळाला होता. भारताबाहेर विजेतेपद मिळवणारे नंदू नाटेकर पहिले बॅडमिंटन खेळाडू आहेत. त्यांनी १५ वर्षाच्या कारकिर्दीत १०० पेक्षा जास्त स्पर्धा जिंकल्या आहेत. त्यात १७ राष्ट्रीय विजेतेपदांचा समावेश आहे. ६ एकेरी, ६ दुहेरी, ५ मिश्र दुहेरी स्पर्धेत त्यांनी भारताचं प्रतिनिधित्व केलं आहे.

नंदू नाटेकर स्पोर्ट्स अँड फिटनेस (एनएसएफ) चे संचालक होते. सांगलीत जन्म झालेल्या नाटेकरांचं मुंबईतील रामनारायण रुईया महाविद्यालयातशिक्षण झालं आहे. त्यांचा मुलगा गौरव नाटेकर टेनिस स्पर्धेत सात वेळा भारतीय राष्ट्रीय चॅम्पियन आहे.

प्रतिस्पर्धी खेळाडूला उद्देशून नंदू नाटेकर यांनी कधीही वाचाळपणा केला नाही. त्यांनी आपल्या रॅकेटने प्रत्युत्तर दिलं. नंदू नाटेकर यांनी आपल्या अद्भूत खेळाने भारतामध्ये बॅडमिंटन खेळाची दखल घ्यायला लावली होती. अफलातून सातत्यासाठी नाटेकर यांना ‘गोल्डन बॉय ऑफ इंडियन बॅडमिंटन’ अशी उपाधी देण्यात आली होती. सध्याच्या तरुण बॅडमिंटनपटूंना नंदू नाटेकर यांच्याकडून खूप काही शिकण्यासारखं आहे. नंदू नाटेकर म्हणजे बॅडमिंटनचं विद्यापीठच आहे. 60 च्या दशकात नाटेकर एकाचवेळी एकेरी, दुहेरी आणि मिश्र दुहेरी अशा तीन प्रकारामध्ये खेळत होते. आताचे खेळाडू एकेरी किंवा दुहेरी असा एकच पर्याय निवडतात.