वाघोली: वेगवेगळ्या राज्यात ९० पेक्षा अधिक जबरी चोरीचे गुन्हे दाखल असलेल्या अट्टल गुन्हेगाराला गुन्हे शाखा युनिट सहाने वाघोलीत जेरबंद केले. अच्युत सोमांना कुमार ( वय 34, रा. कोळीवाड जि. धारावाड, हुबळी, कर्नाटक ) असे अटक केलेल्या गुन्हेगाराचे नाव आहे.

पोलिसांनी दिलेल्या माहितीनुसार, हा गुन्हेगार अनेक दिवसापासून फरार होता. हैद्राबाद पोलीस त्याचा शोध घेत होते. तो वाघोली येथील चोखी धानी रोड वरील बजाज शोरुम जवळ असल्याची माहिती गुन्हे शाखा युनिट सहाला मिळाली. युनिट सहाचे पथक व हैद्राबाद पोलीस यांनी त्याला सापळा रचून शोरुम जवळ पकडले.

तो रेकॉर्ड वरील गुन्हेगार असून त्याच्यावर विविध राज्यात ९० पेक्षा अधिक जबरी चोरीचे गुन्हे दाखल आहेत. पुढील कार्यवाहीसाठी त्याला हैद्राबाद पोलिसांकडे सुपूर्त करण्यात आले. ही कामगिरी गुन्हे शाखा युनिट सहाचे पोलीस निरीक्षक सुदर्शन गायकवाड यांच्या मार्गदर्शनाखाली रमेश मेमाणे, नितीन मुंढे, सचिन पवार, ऋषिकेश ताकवणे, समीर पिलाने, ऋषिकेश व्यवहारे, नितीन धाडगे, बाळासाहेब तनपुरे , गणेश डोंगरे, कीर्ती मांदळे, सुहास तांबेकर यांच्या पथकाने केली.