शिक्रापूर : वीजबील थकले म्हणून वीज मिटर बंद करणाऱ्या साहय्यक अभियंत्यासह शिकाऊ महिला तंत्रज्ञाला लाथाबुक्क्यांनी मारहाण करणाऱ्या एका डॉक्टरसह चौघांवर सरकारी कामात अडथळा, मारहाण, शिवीगाळीचा गुन्हा शिक्रापूर पोलिसांनी नुकताच दाखल केला. दरम्यान सरकारी कर्मचाऱ्यांच्या बाबतीत या पुढील काळात कुणी आगळीक केल्यास आपण कठोरात कठोर पावले उचलणार असल्याची माहिती पोलिस निरीक्षक हेमंत शेडगे यांनी दिली.

याबाबत शिक्रापूर पोलिसांनी सांगितले की, बुधवारी (ता. २३) दुपारी एकच्या सुमारास येथील पाबळ चौकातील संजीवनी हॉस्पिटलच्या शेजारी महावितरणचे साहय्यक अभियंता गणेश वगरे व शिकाऊ महिला तंत्रज्ञ संगीता शालीकराम तरोने यांना डॉ. ज्ञानेश्वर टेमक, संजय गव्हाणे, गीतांजली संजय गव्हाणे व विनायक माणिक साबळे यांचेसह निळ्या टि शर्टात वावरत असलेल्या एका युवकाने वीज बील थकल्याने वीजजोड तोडणा-या सहायक अभियंता गणेश वगरे व शिकाऊ महिला तंत्रज्ञ संगीता शालीकराम तरोने यांचेसह वीज कर्मचा-यांना शिवीगाळ, मारहाण केली. यात संगीता तरोने यांचा मोबाईल हिसकावून फेकून देत त्यांचा हात पिरगळला. याबाबत वगरे यांच्या तक्रारीवरुन वरील चारही आरोपींवर शासकीय कामात अडथळा, शिवीगाळ, मारहाण आदी गुन्हे दाखल करण्यात आल्याची माहिती शिक्रापूर पोलिसांनी दिली.

दरम्यान, थकलेल्या वीजबीलाच्या कारणाने वीजवितरण कर्मचा-यांना झालेली मारहाण याबाबत आपण गंभीरपणे या गुन्ह्याकडे पाहत असून, या पुढील काळात कुणाही शासकीय कर्मचारी-अधिकारी यांचेबाबतीत आगळीक केल्यास अशांविरोधात आपण कठोरात कठोर पावले उचलणार असल्याचे पोलिस निरीक्षक हेमंत शेडगे यांनी सांगितले.