पुणे - कोथरूडमधून अटक केलेल्या दोन्ही दहशतवाद्यांचा ‘इसिस’ आणि ‘अल सुफा’ या दहशतवादी संघटनेशी संबंध असल्याचे निष्पन्न झाल्याने व गुन्ह्याची व्याप्ती वाढल्याने पुण्यातील दहशतवादी कारवायांचा तपास आता ‘राष्ट्रीय तपास यंत्रणे’कडे (एनआयए) वर्ग करण्यात आला. विशेष न्यायाधीश व्ही. आर. कचरे यांनी हा आदेश दिला. न्यायालयाने मंगळवारी सर्व कागपत्रसांसह हे प्रकरण एनआयएकडे सोपविले.

सुरवातीला पुणे पोलिसांनी आणि त्यानंतर ‘दहशतवादविरोधी पथका’ने (एटीएस) या गुन्ह्याचा तपास केला होता. नव्याने गुन्हा दाखल करून तपास हस्तांतरित करण्याचा अर्ज ‘एनआयए’ने सोमवारी (ता.७) येथील विशेष न्यायालयात दाखल केला होता.

तसेच एनआयएचे तपास अधिकारी प्रवीण इंगोले यांनी गुन्ह्याचा तपास वर्ग करण्याची मागणी केली होती. त्यामुळे मंगळवारी (ता.८) सायंकाळी पाच वाजण्याच्या सुमारास पाचही दहशतवाद्यांना न्यायालयात हजर करण्यात आले होते. एटीएसचे तपास अधिकारी अरुण वायकर यावेळी उपस्थित होते.

यावेळी एटीएसच्यावतीने विशेष सरकारी वकील विजय फरगडे यांनी बाजू मांडली तर एनआयएच्या वतीने विशेष सरकारी वकील एस. के. सदावर्ते यांनी युक्तिवाद केला. त्यावर न्यायालयाने न्यायालयात उपलब्ध असलेली या गुन्ह्यासंबंधी सर्व कागदपत्रे एटीएस आणि एनआयएच्या अधिकाऱ्यांच्या उपस्थितीत एनआयएकडे सोपवली.

कोथरूड परिसरात दुचाकी चोरण्याच्या प्रयत्नात असलेल्या महंमद युनूस महंमद याकूब साकी (वय २४) आणि महंमद इम्रान महंमद युसूफ खान (वय २३ दोघे रा. चेतना गार्डन, मिठानगर, कोंढवा, मूळ रतलाम, मध्य प्रदेश) यांना कोथरूड पोलिसांनी १८ जुलै २०२३ रोजी अटक केली आहे.

कोंढवा भागात याकूब साकी आणि इम्रान खान यांना राहण्यास खोली देणारा अब्दुल कादीर दस्तगीर पठाण (वय ३२, रा. कोंढवा) आणि त्यांना आर्थिक रसद पुरविणारा मेकॅनिकल इंजिनिअर सिमाब नसरुद्दीन काझी (वय २७, मूळ रा. रत्नागिरी) देखील अटकेत आहे. तर सर्वांत शेवटी एनआयएच्या पथकाने झुल्फिकार बडोदावाला याला ताब्यात घेतले आहे.

आरोपींना बुधवारी एनआयए न्यायालयात हजर करणार

पाचही दहशतवाद्यांना प्रवासी कोठडी (ट्रान्झिट रिमांड) सुनावण्यात आली आहे. विशेष न्यायाधीश व्ही. आर. कचरे यांच्या न्यायालयातून एनआयएने पाचही दहशतवाद्यांची एनआयए कोठडी घेतली आहे. त्यांना बुधवारी एनआयए न्यायालयात हजर करण्यात येणार आहे. त्यानंतर एनआयए स्वतंत्र पद्धतीने या गुन्ह्याचा तपास करणार आहे.