पिंपरी - पतंगाचा मांजा अडकून गळा चिरल्याने दुचाकीवरील डॉक्‍टर तरुणीचा जागीच मृत्यू झाला. नाशिक फाट्यावरील जेआरडी टाटा उड्डाण पुलावर रविवारी (ता. ७) सायंकाळी पावणेसातच्या सुमारास ही घटना घडली. 

डॉ. कृपाली निकम (वय २६, रा. पिंपळे सौदागर, मूळ रा. धामणगाव, चाळीसगाव, जि. जळगाव) असे मृत्यू झालेल्या तरुणीचे नाव आहे. पोलिसांनी दिलेल्या माहितीनुसार, डॉ. कृपाली या पुण्यावरून भोसरीकडे जात होत्या. त्या नाशिक फाट्यावरील दुमजली उड्डाण पुलावरून जाताना पतंगाचा मांजा त्यांच्या गळ्याला अडकल्याने त्या दुचाकीवरून कोसळल्या. त्यांचा गळा खोलवर चिरल्याने मोठ्या प्रमाणात रक्तस्राव झाला. तेथील नागरिकांनी त्यांना तातडीने भोसरीतील खासगी रुग्णालयात दाखल केले. मात्र, डॉक्‍टरांनी त्या उपचारापूर्वीच मृत झाल्याचे सांगितले. याबाबत भोसरी पोलिसांनी अज्ञात व्यक्तीविरोधात गुन्हा दाखल केला आहे.  

मांजाने गळा कापल्याने ‘सकाळ’च्या जाहिरात आणि मार्केटिंग विभागातील कर्मचारी सुवर्णा मुजुमदार या ७ फेब्रुवारी रोजी जखमी झाल्या होत्या. त्यांचा ११ फेब्रुवारीला मृत्यू झाला होता. 

चिनी मांजा विक्रीला हवा चाप
सर्वोच्च न्यायालयाने ‘नायलॉन’च्या चिनी मांजाचे उत्पादन आणि विक्रीवर निर्बंध घातले आहेत. या मांजाचा वापर करू नये, असे आवाहनही प्रशासन व पोलिसांकडून वारंवार करण्यात येते. तरीही हा मांजा शहरातील दुकानांत सर्रासपणे विकला जातो. पतंग उडविताना काही हौशी तरुणांकडून नायलॉनचा चिनी मांजा वापरण्याचे प्रमाण वाढले आहे. या नायलॉनच्या मांजाने लहान मुले आणि दुचाकीस्वारांचे हात आणि गळा चिरल्याच्या घटना घडत आहेत. दरम्यान, शहर पोलिस या मांजा विक्रेत्यांवर कठोर कारवाई कधी करणार, असा प्रश्‍न नागरिक उपस्थित करीत आहेत. 

मांजा अडकून डॉ. कृपाली निकम यांचा मृत्यू झाल्याप्रकरणी अज्ञात व्यक्तिविरोधात कायदेशीर कारवाई सुरू केली असून, दोषींचा शोध घेण्यात येणार आहे. मांजा विक्रीला बंदी असताना अशा पद्धतीने विक्री करणाऱ्यांवर कडक कारवाई केली जाईल. महापालिका प्रशासनालाही कारवाईचे अधिकार आहेत. त्यांनीही याबाबत कारवाई करावी. 
- अजय भोसले, पोलिस निरीक्षक (गुन्हे), भोसरी पोलिस ठाणे