बारामती : दरवर्षी उन्हाळा सुरु झाला की बारामतीतील एका अवलियाची लगबग सुरु होते ती जंगलातील पाठवठ्यांमध्ये पाणी सोडण्याची गेल्या सहा वर्षांपासून बारामतीचे उद्योजक चकोर वाघोलीकर या कामात आपणहून पुढाकार घेतात.

कोणालाही कसलीही मदत न मागता स्वखर्चाने जितके जमेल तितके करत राहायचे या एकाच भावनेने वन्यजीवांच्या पिण्याच्या पाण्याची गरज ते भागवित आहेत. याही वर्षी त्यांनी एकाच दिवशी बारामतीनजिक असलेल्या अकरा पाणवठ्यांमध्ये सहा टँकर म्हणजे 90 हजार लिटर पाणी सोडले. जराडवाडी, उंडवडी, गोजुबावी, गाडीखेल, पारवडी, म्हसोबावाडी येथील हे पाणवठे होते.

दरम्याग गेल्या वर्षी कोविडच्या संकटाच्या काळातही 15 मार्च ते 15 जून या कालावधीत त्यांनी 21 टँकरच्या मदतीने तीन लाख लिटर पाणी वन्यजीवांसाठी स्वखर्चाने पाणवठ्यात सोडले. यंदाही तीन लाख लिटर पाणी सोडण्याचा त्यांचा संकल्प आहे. त्यांचा हा उपक्रम बघून अनेक जण उत्स्फूर्तपणे त्यांना मदतीचा हात पुढे करत आहेत.

अजय शहा, हितेन शहा, मयूरी शहा, प्रफुल्ल जोशी, भवन जुदाल, आदित्य जैन, पंडीत कपिल गोहिल, शिरीष राजाध्यक्ष, संदीप घुगे, प्रसाद सोमवंशी, सुशांत सावंत या मुंबईकरांसह दिल्लीतील परमिंदरसिंग, पुण्यातील सोनिया, रितू व राधिका शहा, वडूजच्या मोना शहा, बारामतीचे मिलिंद, समीर, रवीना, संगीता, मंजुषा, सलोनी व कुसुम शहा यांनी या उपक्रमात मदत केलेली आहे.

मुक्या जीवांसाठीच फक्त हा उपक्रम

ज्यांना बोलता येत नाही अशा जंगलातील मुक्या जिवांना उन्हाळ्यात पाण्यासाठी वणवण करावी लागते, त्या उद्देशाने हा उपक्रम हाती घेतला आहे. हळुहळू अनेक हात मदतीसाठी पुढे येत असून लोकसहभागातून हा उपक्रम अधिक व्यापक करण्याचा मानस आहे- मिलिंद वाघोलीकर, बारामती.