बारामती - नुकत्या पंढरपूर सायकल वारीमध्ये बारामतीच्या बारामती सायकल क्लबच्या सदस्यांनी सहभागी होत आषाढी वारीनिमित्त आणि पर्यावरण संतुलन, शारीरिक समृद्धी महत्व अधोरेखीत केले.

यंदाच्या पंढरपूर सायकलवारीमध्ये राज्यभरातील 46 सायकल क्लबच्या 1499 सायकलस्वारांनी सहभाग नोंदविला. महाराष्ट्राची पंढरपूर सायकलवारी आणि संमेलन 2023 चे दुसरे पर्व नुकतेच पार पडले.

बारामतीकर सायकलस्वारांनी 11 जून रोजी सकाळी पंढरपूर नगर प्रदक्षिणा सायकलवर केली. त्या नंतर रेल्वे ग्राऊंडवर सायकल रिंगण सोहळा विठ्ठलाचे नामस्मरण करीत झाला. समारोप सायकल संमेलनाद्वारा झाला. या संमेलनादरम्यान समाजासाठी आदर्श काम केलेल्या मान्यवरांना गौरविण्यात आले. पर्यावरण संतुलन बाबतीत सायकलिंगबाबत प्रचार आणि प्रसार करण्याबाबत निर्णय घेण्यात आला.

सुनील पाटील प्रमुख पाहुणे तर उमेश परिचारक संमेलनाचे अध्यक्ष होते. नाशिक सायकलिस्ट फाउंडेशनचे अध्यक्ष किशोर माने आणि बारामती सायकल क्लबचे प्रतिनिधी रमेश पांडकर उपस्थित होते.

यंदाच्या या उपक्रमाचे आयोजन व यजमानपद बारामती सायकल क्लबकडे होते. सायकल क्लबचे प्रमुख अँड. श्रीनिवास वायकर यांच्या नेतृत्वाखाली या उपक्रमाचे सुरेख संयोजन केले गेले. संमेलनात उपस्थित सर्व 1600 सायकलस्वारांना प्रमाणपत्र देऊन गौरविले गेले.