पुणे - बोपदेव घाटात तरुणीवरील लैंगिक अत्याचार प्रकरणातील आरोपींचा पुणे पोलिसांकडून कसून शोध घेण्यात येत आहे. या गुन्ह्याच्या तपासासाठी इतर जिल्ह्यांतील पोलिस अधिकाऱ्यांनाही पाचारण करण्यात आले असून, तीनशेहून अधिक पोलिस अधिकारी आणि कर्मचारी आरोपींच्या मागावर आहेत.

बोपदेव घाट परिसरात गुरुवारी (ता. ३) रात्री अकरा वाजण्याच्या सुमारास महाविद्यालयीन तरुणी मित्रासमवेत फिरण्यास गेली होती. त्यावेळी तीन आरोपींनी तरुणीसह तिच्या मित्राला कोयत्याचा धाक दाखवत बांबूने मारहाण केली. त्यानंतर तिघांनी तरुणाला शर्ट आणि बेल्टने बांधून तरुणीवर लैंगिक अत्याचार केला.

‘पुणे पोलिसांच्या गुन्हे शाखेसह विविध तपास पथके आरोपींचा शोध घेत आहेत. त्यासाठी अन्य जिल्ह्यांतील काही सक्षम पोलिस अधिकाऱ्यांचीही मदत घेण्यात येत आहे. तीनशेहून अधिक पोलिस अधिकारी आणि कर्मचारी प्रयत्न करीत आहेत,’’ अशी माहिती पोलिस सह आयुक्त रंजनकुमार शर्मा यांनी दिली.

या प्रकरणात आत्तापर्यंत दोनशेहून अधिक संशयितांची चौकशी करण्यात आली आहे. पीडित तरुणीने दिलेल्या माहितीवरून पोलिसांनी दोन आरोपींची रेखाचित्रे तयार केली आहेत. पुणे पोलिसांनी आरोपींची माहिती देणाऱ्यास दहा लाख रुपयांचे बक्षीस जाहीर केले आहे.

खासगी सायबर तज्ज्ञांची मदत -

पोलिसांनी घटनेच्या कालावधीत बोपदेव घाटातून प्रवास केलेल्या तीन हजार मोबाइलधारकांची माहिती आणि परिसरातील सीसीटीव्ही चित्रीकरण संकलित केले आहे. या सर्व माहितीच्या आधारे ‘एआय’ तंत्रज्ञानाच्या मदतीने तांत्रिक विश्लेषण करण्यात येत आहे. तसेच, खासगी सायबर तज्ज्ञांचीही मदत घेण्यात येत असल्याचे पोलिस सह आयुक्त रंजनकुमार शर्मा यांनी सांगितले.