पुणे - कॉंग्रेस आणि राष्ट्रवादी काँग्रेस या दोन्ही कॉंग्रेस भ्रष्टाचाराच्या बाबतीत सारख्याच आहेत. मुळात राष्ट्रवादी कॉंग्रेस हा कॉंग्रेसमधून फुटून बाहेर पडल्यानंतरच जन्माला आलेला पक्ष आहे. त्यामुळे या दोन्ही काँग्रेस भ्रष्टाचार,कमिशनखोरी, लुबाडणूक, दलाली आणि लाचखोरी याच इतिहासाने बरबटलेल्या आहेत, असा आरोप भाजपचे प्रदेश उपाध्यक्ष माधव भांडारी यांनी शनिवारी (ता.९) पुण्यात पत्रकार परिषदेत बोलताना केला.

भारतीय राष्ट्रीय कॉग्रेसचे खासदार धीरज साहू यांच्याकडे सुमारे तीनशे कोटींची बेहिशोबी मालमत्ता सापडली आहे. त्यांच्याकडे एवढी मोठी मालमत्ता सापडल्यानंतरही काँग्रेसने कोणतीही भूमिका जाहीर केलेली नाही. त्यामुळे साहू यांच्या या बेहिशोबी मालमत्तेचा सर्वोच्च नेतृत्वाशी संबंध आहे का, अशी शंका निर्माण झाल्याचे मत भांडारी यांनी यावेळी व्यक्त केले.

राज्यात सध्या भाजपचा मित्र असलेल्या राष्ट्रवादी कॉग्रेसचे (अजित पवार गट) माजी केंद्रीय मंत्री प्रफुल्ल पटेल यांच्यावर होत असलेल्या भ्रष्टाचाराच्या आरोपांबाबत पत्रकारांनी प्रश्‍न विचारला असता भांडारी यांनी भ्रष्टाचाराच्या बाबतीत काँग्रेस आणि राष्ट्रवादी काँग्रेस एकाच नाण्याच्या दोन बाजू असल्याचे त्यांनी सांगितले. ते पुढे म्हणाले, ‘प्राप्तीकर विभागाने टाकलेल्या छाप्यांमध्ये काँग्रेसचे राज्यसभेचे खासदार धीरज साहू यांच्या घरी सुमारे तीनशे कोटींची बेहिशोबी मालमत्ता सापडली आहे.

ही संपत्ती मोजताना, मशिनही बंद पडल्या. एवढ्या मोठ्या प्रमाणात पैसे सापडूनही काँग्रेस पक्षाकडून साहू यांच्यावर कोणतीच कारवाई करण्यात आली नाही. साहू यांचा दारूचा व्यवसाय आहे. तरीसुद्धा काँग्रेसकडून त्यांना खासदारकी दिली जाते. साहू हे राहुल गांधी यांच्या जवळचे असल्याने, ते तीन वेळा खासदार झाले आहेत. त्यामुळे त्यांचा कॉंग्रेसच्या सर्वोच्च नेतृत्वाशी संबंध आहे का, असा प्रश्‍न पडतो.’’