पुणे - भीक मागण्याच्या बहाण्याने घरातून दागिने चोरणाऱ्या महिलेला चंदननगर पोलिसांनी अटक केली. महिलेसह तिच्या अल्पवयीन साथीदाराकडून ३५ लाखांचे सोन्याचे दागिने, रोकड आणि मोटार जप्त केली आहे.

मिली दीपक पवार (वय २०, रा. आडगाव नाका, पंचवटी, जि. नाशिक) असे अटक केलेल्या महिलेचे नाव आहे.

पोलिसांनी त्याच्यासह अन्य एका अल्पवयीन मुलाला ताब्यात घेतले आहे. चंदननगर पोलिस ठाण्यात दाखल एका घरफोडीच्या गुन्ह्याचा तपास पोलिस करीत होते. तीन महिन्यांपूर्वी दागिने आणि रोकड चोरीच्या घटनेतील महिला आणि अन्य एकजण आळंदी देवाची परिसरात आल्याची माहिती सहाय्यक पोलिस निरीक्षक सिद्धनाथ खांडेकर आणि हवालदार महेश नाणेकर यांना मिळाली.

पोलिसांनी आरोपींना ताब्यात घेत चौकशी केली असता त्यांनी उडवाउडवीची उत्तरे दिली. पोलिसांनी त्यांना चंदननगर पोलिस ठाण्यात आणून अंगझडती घेतली. त्यावेळी त्यांच्याकडे सोन्याचे दागिने आणि रोकड आढळली. चौकशीदरम्यान, आरोपींनी ते भीक मागण्याच्या बहाण्याने नजर चुकवून घरात प्रवेश करून चोरी करीत असत. १८ ऑगस्ट रोजी टिंबर मार्केटमधील एका घरातून चोरी केल्याचे सांगितले.

याबाबत खडक पोलिस ठाण्यात गुन्हा दाखल करण्यात आला होता. तसेच, तीन महिन्यांपूर्वी चंदननगर परिसरात एका घराचा दरवाजा उघडा असल्याची संधी साधून दागिने चोरी केल्याची कबुली दिली. आरोपींकडून ३५ लाख रुपयांचे ५२ तोळे सोन्याचे दागिने, २६ हजारांची रोकड आणि चारचाकी गाडी असा ४० लाख ७६ हजार रुपयांचा मुद्देमाल जप्त करण्यात आला आहे.

अतिरिक्त पोलिस आयुक्त मनोज पाटील, पोलिस उपायुक्त हिम्मत जाधव, सहाय्यक आयुक्त प्रांजली सोनवणे यांच्या सूचनेनुसार वरिष्ठ पोलिस निरीक्षक संजय चव्हाण, पोलिस निरीक्षक (गुन्हे) अनिल माने यांच्या पथकातील सहाय्यक निरीक्षक सिद्धनाथ खांडेकर, पोलिस कर्मचारी महेश नाणेकर, सचिन रणदिवे, शिवाजी धांडे, प्रफुल्ल मोरे, सचिन पाटील, विकास कदम, अमोल जाधव, शीतल वानखेडे, पूजा डहाळे, मनीषा पवार आदी कर्मचाऱ्यांनी ही कारवाई केली.