उरुळी कांचन, ता. १२ : दोन दिवसांपूर्वी कदमवाकवस्ती (ता. हवेली) ग्रामपंचायत हद्दीतील ॲक्सिस बँकेसमोर सकाळी आठ वाजण्याच्या सुमारास दोन दुचाकी व बसचा तिहेरी अपघात झाला. या अपघातात ज्ञानेश्वरी श्यामराव लाटे (वय २०, रा. एम.आय.टी. स्टाफ क्वार्टर, लोणी स्टेशन, ता. हवेली) ही नर्सिंगची विद्यार्थिनी गंभीर जखमी झाली होती. याबाबत शिवराम बन्सी कराड (वय ३८, रा. एम.आय.टी. स्टाफ क्वार्टर, लोणी स्टेशन, ता. हवेली) यांनी लोणी काळभोर पोलिस ठाण्यात फिर्याद दिली आहे.

या प्रकरणी लोणी काळभोर पोलिस ठाण्यात पीएमपीएल चालक सोमनाथ बाळासाहेब बसाटे (वय ४५, रा. महारूद्रा वास्तु कवडीपाट टोलनाका ता. हवेली) व दत्ताराम रमेश कांबळे (वय ३४ गंगानगर फुरसुंगी हडपसर, पुणे) अशी गुन्हा दाखल झालेल्यांची नावे आहेत.

लोणी काळभोर पोलिसांनी दिलेल्या माहितीनुसार, ज्ञानेश्वरी लाटे ही फिर्यादी शिवराम कराड यांची भाची आहे. ज्ञानेश्वरी ही वाघोली येथील एका नर्सिंग कॉलेजमध्ये द्वितीय वर्षात शिक्षण घेत आहे. फिर्यादी हे ज्ञानेश्वरीला बस स्टॉपवर सोडवण्यासाठी दुचाकीवरून सोमवारी (ता. १०) सकाळी निघाले होते. त्यांची दुचाकी कदमवाकवस्ती ग्रामपंचायत हद्दीतील ऐटुझेड कलेक्शन समोर आली असता एचपीसीएल कॅन्टीन मॅनेजर दत्ताराम कांबळे यांनी फिर्यादी यांच्या दुचाकीला जोरदार धडक दिली. त्यामुळे फिर्यादी हे रस्त्याच्या उजव्या बाजूला पडले. तर त्यांची भाची ज्ञानेश्वरी गाडीवरून उडून पीएमपीएल बसच्या चाकाच्या समोर पडल्याने पीएमपीएल बसने ज्ञानेश्वरीला दहा ते बारा फूट फरपटत नेले. या अपघातात ज्ञानेश्वरी गंभीर जखमी झाल्याने तिला खासगी रुग्णालयात दाखल करण्यात आले आहे.