पुणे : काल राष्ट्रवादी काँग्रेसने स्मृती इराणी यांच्या विरोधात जोरदार घोषणाबाजी करत त्यांच्या हॉटेलमध्ये घुसण्याचा प्रयत्न केला होता, दरम्यान स्मृती इराणी यांच्या विरोधात आंदोलन करणं राष्ट्रवादी काँग्रेसच्या कार्यकत्यांना भोवलं आहे. या प्रकरणात राष्ट्रवादीच्या ४० ते ५० कार्यकर्त्यांवर पुण्यातील चतु:श्रृंगी पोलिस ठाण्यात गुन्हा दाखल करण्यात आला आहे.

राष्ट्रवादीचे कार्यकर्ते महेश हांडे, निलेश निकम, उदय महाले आणि रुपाली पाटील यांच्यासह ३० ते ४० जणांवर गुन्हे दाखल झाले आहेत.

केंद्रीय मंत्री स्मृती इराणी उपस्थित असलेल्या बालगंधर्व रंगमंदिरातील कार्यक्रमात सोमवारी जोरदार राडा झाला. यावेळी भाजप आणि राष्ट्रवादी काँग्रेसचे कार्यकर्ते एकमेकांना भिडले. यावेळी काही महिला कार्यकर्त्याला मारहाण झाल्याचंही व्हिडिओमधून समोर आलं. काँग्रेस आणि राष्ट्रवादी काँग्रेसच्या कार्यकर्त्यांनी काळे झेंडे दाखवत तीव्र निदर्शने केली. इराणी यांचा ताफा परत जात असताना त्यांच्या वाहनांवर अंडी फेकण्याचा प्रयत्न झाला.

काल स्मृती इराणी यांच्या दौऱ्याला काँग्रेस-राष्ट्रवादी काँग्रेसच्या कार्यकर्त्यांनी सकाळपासूनच निषेध केला आहे. महागाईच्या मुद्द्यावर त्यांनी बोलावं अशी मागणी करत सकाळी हॉटेल जे डब्ल्यू मॅरिएट इथं माजी महापौर प्रशांत जगताप यांच्या नेतृत्वाखाली राष्ट्रवादीच्या कार्यकर्त्यांनी काळे झेंडे दाखवत, फलक हातात घेऊन त्यांच्याविरोधात घोषणाबाजी केली. तर बालगंधर्व रंगमंदिराच्या परिसरात माजी मंत्री रमेश बागवे यांच्या नेतृत्वाखाली आंदोलन करण्यात आलं होतं