पुणे : शारीरिक, मानसिक स्वास्थ्य अबाधित राखण्यासाठी ६५ वर्षे वय व त्यावरील ज्येष्ठ नागरिकांसाठी एकरकमी आर्थिक साह्य देण्याच्या ‘मुख्यमंत्री वयोश्री’ योजनेचा जिल्ह्यातील ज्येष्ठ नागरिकांनी लाभ घ्यावा, असे आवाहन समाज कल्याण विभागाकडून करण्यात आले आहे.

ज्येष्ठ नागरिकांना वयोमानपरत्वे येणाऱ्या दिव्यांगत्व, अशक्तपणावर उपाययोजना करण्यासाठी आवश्यक साह्य साधने, उपकरणे खरेदी करण्यासाठी व मनःस्वास्थ्य केंद्र, योगोपचार केंद्राद्वारे त्यांचे मानसिक स्वास्थ्य अबाधित ठेवण्यासाठी ही योजना राबविण्यात येत आहे. या योजनेच्या लाभासाठी लाभार्थ्याचे वार्षिक उत्पन्न २ लाखांच्या आत असणे आवश्यक आहे. यात पात्र लाभार्थ्यांच्या आधार संलग्न वैयक्तिक बँक खात्यावर एकरकमी ३ हजार रुपये थेट लाभ वितरण (डीबीटी) प्रणालीद्वारे प्रदान करण्यात येतील.

लाभ वितरण झाल्यावर या योजनेअंतर्गत विहित केलेली उपकरणे खरेदी केल्याचे तसेच मन:स्वास्थ केंद्राद्वारे प्रशिक्षण घेतल्याचे लाभार्थ्यांचे देयक प्रमाणपत्र ३० दिवसांच्या आत सहाय्यक आयुक्त समाजकल्याण पुणे यांच्याकडून प्रमाणित करून घ्यावे लागणार आहे.

अधिक माहितीसाठी पात्र अर्जदारांनी समाजकल्याण कार्यालय, डॉ. बाबासाहेब आंबेडकर सामाजिक न्याय भवन येरवडा (दूरध्वनी क्रमांक ०२०-२९७०६६११ ईमेल-acswopune@gmail.com) वर संपर्क साधावा, असे आवाहन सहाय्यक आयुक्त विशाल लोंढे यांनी केले आहे.