पुणे - पुणे शहर आणि जिल्ह्यात कोरोना रुग्णांच्या संख्येत वाढ होत आहे. जिल्ह्यात बुधवारी (ता.17) दिवसभरात 857 नवे कोरोना रुग्ण आढळून आले आहेत. आजच्या एकूण रुग्णांमध्ये पुणे शहरातील 428 जण आहेत. जिल्ह्यात गेल्या चोवीस तासात सहा जणांचा मृत्यू झाला आहे.

शहरातील सर्वाधिक नवीन रुग्णांबरोबरच आज पिंपरी चिंचवडमध्ये 227, जिल्हा परिषद कार्यक्षेत्रात 142, नगरपालिका कार्यक्षेत्रात 51 आणि कॅंटोन्मेंट बोर्ड क्षेत्रात 9 रुग्ण सापडले आहेत. दिवसभरातील एकूण मृत्यूमध्ये शहरातील चार आणि जिल्हा परिषद कार्यक्षेत्रातील दोन रुग्णांचा समावेश आहे. आज पिंपरी चिंचवड, नगरपालिका आणि कॅंटोनमेंट बोर्ड क्षेत्रात एकाही रुग्णाचा मृत्यू झाला नाही.

पुण्यातील इतर बातम्या वाचण्यासाठी क्लिक करा

दरम्यान, दिवसभरात 392 जण कोरोनामुक्त झाले आहेत. कोरोनामुक्तांमध्ये पुणे शहरातील सर्वाधिक 262, पिंपरी चिंचवडमधील 34 , जिल्हा परिषद कार्यक्षेत्रातील 76, नगरपालिका क्षेत्रातील 15 आणि कॅंटोन्मेंट क्षेत्रातील 5 जणांचा समावेश आहे.

वाढत्या संसर्गाच्या पार्श्वभूमीवर कोरोना प्रतिबंधक उपाययोजनासंदर्भात मार्गदर्शक नियमावलीची कठोर अंमलबजावणी करण्याचे निर्देश संबंधित यंत्रणांना जिल्हाधिकाऱ्यांनी दिले आहेत. जिल्ह्यात संचारबंदी नसून, जमावबंदी आहे. सर्वांना मास्क वापरणे बंधनकारक राहणार आहे. तसंच लसीकरण मोहिम प्रभावीपणे राबविण्यात येणार आहे. लग्न समारंभ आणि इतर सार्वजनिक कार्यक्रमांच्या ठिकाणी होणाऱ्या गर्दीवर पूर्वीप्रमाणेच निर्बंध राहतील, अशी माहिती जिल्हाधिकारी डॉक्टर राजेश देशमुख यांनी बुधवारी दिली.

हे वाचा - कुंपणच शेत खातंय! लाच प्रकरणात न्यायाधीशांचाच सहभाग

दरम्यान, मुख्यमंत्री उद्धव ठाकरे यांनी मंगळवारी विभागीय आयुक्त आणि जिल्हाधिकारी यांच्यासोबत व्हिडिओ कॉन्फरन्सिंगद्वारे बैठक घेतली होती. त्यानंतर विभागीय आयुक्त सौरभ राव यांनी जिल्हाधिकारी आणि आरोग्य विभागासह इतर यंत्रणांच्या अधिकाऱ्यांसमवेत बैठक घेऊन उपाययोजना करण्याबाबत सूचना दिल्या आहेत.