Crime News : जुन्या भांडणाचा राग मनात धरुन चुलत भावाने चुलत भावाचा कोयत्याने खून केल्याची घटना घडली. याप्रकरणी पोलिसांनी खून करणाऱ्या दत्तात्रेय जाधव याला शिताफितीने अटक केली.

या घटनेमध्ये हनुमंत सर्जेराव जाधव (वय ३६,रा.जाधवस्ती,कळंब) यांचा चुलत भावाने कोयत्याने वार करुन खून केल्याची घटना घडली. याप्रकरणी पोलिसांनी दत्तात्रेय हरिदास जाधव (वय ३८) याला अटक केली असून खूनाचा गुन्हा दाखल केला आहे. मयत झालेल्या हनुमंत जाधव यांची पत्नी रेश्‍मा हनुमंत जाधव यांनी वालचंदनगर पोलिस ठाण्यात फिर्याद दिली आहे .

वालचंदनगर पोलिसांनी दिलेल्या माहितीनूसार दत्तात्रेय जाधव व मयत हनुमंत जाधव यांची आई कमल जाधव यांच्यामध्ये २०१२ मध्ये मारामारी झाल्याची घटना घडली होती. याप्रकरणी पोलिस ठाण्यामध्ये जीवे मारण्याचा प्रयत्न केल्याप्रकरणी दत्तात्रेय जाधव यांच्यावर गुन्हा दाखल करण्यात आला होता. मात्र दोन्ही कुंटूबामध्ये समजोता झाल्याने भांडणे मिटविण्यात आली होती. मात्र या घटनेचा राग दत्तात्रेय जाधव यांच्या मनामध्ये होता.त्यांनी आज बुधवार (ता.२३) रोजी सकाळी सात वाजण्याच्या सुमारास हनुमंत जाधव घराजवळील शेतामध्ये विद्युत मोटर सुरु करण्यासाठी गेले असताना दत्तात्रेय जाधव याने पाठीमागून जावून कोयत्याने हनुमंत जाधव यांच्या डोक्यावर,पाठीवर व हातावर वार करुन गंभीर जखमी केले.

व शेजारील विहीरीमध्ये ढकलुन देवून पळुन गेले. सदरच्या घटनेची माहिती कुंटूबातील नागरिकांना मिळतातच तातडीने विहिरीमधून बाहेर काढून बारामतीमध्ये खासगी दवाखान्यामध्ये उपचाराठी दाखल केले हाेते. मात्र उपचार सुरु होण्यापूर्वी जाधव यांचा मृत्यू झाला होता. खूनानंतर दत्तात्रेय जाधव हा पळुन जावून उसामध्ये लपला होता.वालचंदनगर पोलिसांनी शिताफितीने त्याला ताब्यात घेवून अटक केली. अधिक तपास वालचंदनगर पोलिस ठाण्याचे सहयाक पोलिस निरीक्षक विक्रम साळुंखे करीत आहेत.