दौंड : दौंड शहरात एका डॅाक्टर महिलेचा विनयभंग केल्याप्रकरणी राजेश उर्फ राजू नारायण गायकवाड या तरूणाला अटक करण्यात आली आहे. दौंड पोलिस ठाण्याचे निरीक्षक विनोद घुगे यांनी या बाबत माहिती दिली. २४ सप्टेंबर रोजी राजेश नारायण गायकवाड (वय ३०, रा. भीमनगर, दौंड) याने संबंधित डॅाक्टर महिला ज्या खासगी रूग्णालयात नेमणुकीस आहे तेथे जाऊन ` माझे तुझ्यावर प्रेम आहे ` असे सांगत त्यांचा हात पकडून विनयभंग केला.

डॅाक्टर महिलेने प्रतिकार करून जाब विचारला असता राजेश गायकवाड याने शिवीगाळ करीत त्यांना जीवे मारण्याची धमकी दिली. या बाबत डॅाक्टर महिलेने २५ सप्टेंबर रोजी रात्री फिर्याद दाखल केली. दाखल फिर्यादीवरून राजेश नारायण गायकवाड याच्याविरूध्द भारतीय दंड विधान कलम ३५४ ( विनयभंग व बलप्रयोग करणे ), कलम ५०४ ( शांतताभंग करण्याच्या उद्देशाने अपमान करणे) व कलम ५०६ ( फौजदारीपात्र धाकदपटशा करणे) अन्वये गुन्हा दाखल करून अटक करण्यात आली आहे. फौजदार भगवान पालवे पुढील तपास करीत आहेत.