दौंड - कत्तल करण्याच्या उद्देशाने एका टेम्पोत दाटीवाटीने बांधण्यात आलेले तब्बल एकवीस रेड्यांची सुटका करण्यात दौंड पोलिसांना यश आले आहे. या कारवाईत पाच लाख रूपयांचा मुद्देमाल जप्त करण्यात आला आहे.

पुणे जिल्ह्यातील दौंड पोलिसांनी या बाबत माहिती दिली. दौंड रेल्वे उड्डाणपुलावरून पाटसच्या दिशेने एक टेम्पो (एम. एच. ०३, डी. व्ही. ३३८०) जात असताना दौंड पोलिसांच्या पथकाने कागदपत्रांच्या चौकशीसाठी थांबविला होता. टेम्पोच्या आतील मालाबद्दल विचारणा करताच चालकाने विसंगत उत्तर दिले. पोलिसांनी पाहणी केली असता टेम्पोत अत्यंत दाटीवाटीने एकूण २१ रेडे कोंबून बांधण्यात आल्याचे आढळून आले.

कोल्हापूर जिल्ह्यातून दौंड - पाटस मार्गे हे रेडे कल्याणच्या दिशेने नेले जात असल्याची माहिती टेम्पोचालकाने पोलिसांना दिली. या प्रकरणी दौंड पोलिस ठाण्याचे कॅान्स्टेबल अक्षय घोडके यांच्या फिर्यादीनुसार टेम्पोचालक मुस्तफा मोहमंद शफिक शहा (वय ३५ , रा. पालापुर, उत्तरौला, उत्तर प्रदेश) व त्याचा सहकारी अब्दुल इब्राहीम कुरेशी ( वय ५२, रा. माढा, जि. सोलापूर) यांच्याविरूध्द गुन्हा दाखल करण्यात आला आहे.

दौंड पोलिसांनी या २१ रेड्यांची रवानगी एका गोशाळेत केली असून टेम्पोसह एकूण ५ लाख ६५ हजार ७०० रूपयांचा मुद्गेमाल जप्त केला आहे, अशी माहिती अंमलदार अमिर शेख यांनी दिली.