पुणे : शैक्षणिक वर्ष २०२१-२२ मधील आरोग्य विज्ञान पदवी अभ्यासक्रमांच्या प्रवेशाची अंतिम मुदत जाहीर करण्यात आली आहे. या अंतर्गत एमबीबीएस अभ्यासक्रमांसाठी ५ एप्रिल, तर बीडीएस अभ्यासक्रमासाठी ११ एप्रिलपर्यंत प्रवेशाचा अंतिम कालावधी राज्य सामाईक प्रवेश परीक्षा कक्षाच्या वतीने जाहीर केला आहे.

वैद्यकीय, दंत, आयुर्वेद, होमिओपॅथी, युनानी, फिजिओथेरपी, ऑक्युपेशनथेरपी, ऑडिओ स्पिच लॅग्वेज, प्रोस्थोटिस्क ॲण्ड ऑर्थोटिक्स या आरोग्य विज्ञान पदवी अभ्यासक्रमाचे प्रवेश हे ‘नीट-युजी २०२१’ या परीक्षेच्या गुणवत्तेच्या आधारे देण्यात येतात. इतर अभ्यासक्रमांच्या प्रवेशाची अंतिम तारीख पाहता नर्सिंग अभ्यासक्रमासाठी प्रवेशाची अंतिम तारीख वाढविण्याबाबत नवी दिल्लीतील भारतीय नर्सिंग परिषद यांना राज्य सामाईक प्रवेश परीक्षा कक्षाने विनंती करण्यात केली होती. परंतु नर्सिंग परिषद यांनी नर्सिंग अभ्यासक्रमाच्या प्रवेशाची अंतिम मुदत ३१ मार्चपर्यंत असून त्यात बदल करणार नसल्याचे कळविले आहे.

त्यानुसार शैक्षणिक वर्ष २०२१-२२ मध्ये राज्यातील शासकीय, खासगी, विनाअनुदानित, अल्पसंख्याक नर्सिंग महाविद्यालयातील रिक्त जागांवरील प्रवेशासाठी रिक्त जागा या संस्थास्तरीय प्रवेश प्रक्रियेद्वारे भरण्यासाठी संबंधित संस्थांना वर्ग करण्यात येत आहेत. संस्थास्तरीय प्रवेश प्रक्रिया ही २८ ते ३१ मार्च दरम्यान राबविण्यात येत आहे. संस्थास्तरीय प्रवेश प्रक्रियेचे सविस्तर वेळापत्रक, उपलब्ध जागांची माहिती, अर्जाचा नमुना राज्य सीईटी कक्षाकडून उपलब्ध करून देण्यात येणार आहे. तरी संबंधित उमेदवार, शैक्षणिक संस्था यांनी अधिक माहितीसाठी राज्य सीईटी कक्षाचे ‘www.mahacet.org’ संकेतस्थळावर भेट द्यावी, असे आवाहन सीईटी सेलतर्फे करण्यात आले आहे.