Pune News : अमली पदार्थ तस्करीतील मुख्य सूत्रधार ललित पाटील प्रकरणाचा तपास संथ गतीने सुरू असून आहे. मुख्य आरोपीची पाठराखण केली जात आहे. त्यामुळे राज्य सरकारसह पोलिसांच्या विरोधात बुधवारी (ता. २९) पोलिस आयुक्तालयासोर ठिय्या आंदोलन करण्याचा इशारा काँग्रेसचे आमदार रवींद्र धंगेकर यांनी दिला आहे.

पत्रकार परिषदेत रवींद्र धंगेकर म्हणाले, ललित पाटील प्रकरणाच्या चौकशी समितीच्या अहवालात दोषी आढळून आलेले ससूनचे तत्कालीन अधिष्ठाता डॉ. संजीव ठाकूर यांना केवळ पदमुक्त केले.

पोलिसांनी मोक्का अंतर्गत त्यांच्यावर कोणतीही कारवाई केलेली नाही. पैशांची देवाण घेवाण करणारा त्यांचा सहकारी कर्मचारी महेंद्र शेवते यालाही अटक झालेली नाही. कारागृह प्रशासनातील अधिकारी, कर्मचाऱ्यांचीही चौकशी झालेली नाही. या प्रकरणात ज्यांच्यावर संशय आहे, त्या सर्वांना अभय देण्याचा प्रकार सुरु आहे.

गृहमंत्री देवेंद्र फडणवीस हे या प्रकरणात लक्ष घातले असते तर आम्हाला रस्त्यावर उतरण्याची वेळ आली नसती. ललित पाटीलने ससूनमधून ड्रग्जचा धंदा केला. यासाठी पोलिस, सरकारी अधिकारी, डॉक्टरांना कोट्यावधी रुपये वाटले आहेत, असा आरोप धंगेकर यांनी केला. पण याचा तपास होत नसल्यानेच पोलिस आयुक्तालयासमोर आंदोलन करणार आहे, असे धंगेकर यांनी सांगितले.