राज्यात मागील काही दिवसांपासून मराठा आरक्षणाचा मुद्दा पेटलेला आहे. यादरम्यान पुण्यात कार्यक्रमासाठी आलेल्या बागेश्वर महाराज यांनी मराठा आरक्षणावर भाष्य केलं आहे. मराठा आरक्षणाला माझा पाठींबा असल्याची घोषणा बागेश्वर महाराज यांनी केली आहे. मराठ्यांच्या बरोबर आम्ही आहोत, मराठा आरक्षणाला माझा पाठींबा आहे, असे बागेश्वर महाराज म्हणाले.

लोकांना सनातन संस्कृती विषयी जागरुक करायला आलो आहे, असेही त्यांनी यावेळी सांगितले. यासोबतच संत तुकाराम महाराज यांच्या विषयी केलेल्या वक्तव्यासाठी मी माफी मागतो असेही बागेश्वर महाराज म्हणाले. जसा वेळ मिळेल तसे मी तुकाराम महाराजांच्या दर्शनासाठी देखील जाणार आहे असेही त्यांनी सांगितले.

पुण्यात घेतलेल्या पत्रकार परिषदेत बोलताना बागेश्वर महाराज यांनी त्यांचा विरोध करणाऱ्या अंधश्रद्धा निर्मुलन समितीवर देखील निशाणा साधला. ते म्हणाले की, विरोध करण्याऱ्यांना कोण थांबवणार. अंधश्रद्धा निर्मुलन समितीने हाजमोलाची गोळी खावी. तसेच त्यांनी सामान्य लोकांचे प्रश्न घेऊन आतापर्यंत दोनच राजकारणी माझ्याकडे आले आहेत असेही माध्यमांशी बोलताना सांगितले.

धीरेंद्र शास्त्री म्हणजेच बागेश्वर महाराज यांनी मराठा आरक्षणाबाबत यापूर्वी देखील भूमिका मांडली होती. मनातलं ओळखणं वेगळं असतं आणि अधिकारांवर बोलणं वेगळं असतं. भारत जेव्हा गुलामीत होता तेव्हा मराठ्यांना शौर्य दाखवून स्वातंत्र्य मिळवून दिलं. त्यामुळे बागेश्वर पीठ मराठा समाजाबांधवांच्या सोबत आहे. त्यांना आरक्षण मिळालंच पाहिजे, असे ते म्हणाले होते. (Marathi Tajya Batmya)