पुणे : पानशेत धरण क्षेत्रात पावसाचा जोर कायम असल्याने धरणात मोठ्या प्रमाणात पाणी जमा होत आहे. त्यामुळे पानशेत धरणातून खडकवासला धरणात सोमवारी पहाटेपासून १५ हजार १३६ क्युसेकने विसर्ग सुरू करण्यात आला आहे.

यापूर्वीच खडकवासला धरण शंभर टक्के भरल्याने धरणातून सोमवारी दुपारी २५ हजार क्युसेकने नदीमध्ये पाणी सोडण्यात येत आहे. त्यामुळे बाबा भिडे पूल पुन्हा पाण्याखाली गेला आहे.

खडकवासला साखळी प्रकल्पात एकूण पाणीसाठा ८६ टक्के म्हणजे २५.०३ टीएमसी इतका पाणीसाठा आहे. मागील २४ तासांत खडकवासला धरणात ९ मिमी, पानशेत धरणात ५० मिमी, वरसगाव मध्ये ५२ मिमी आणि टेमघर धरणात १२० मिमी इतका पाऊस पडला आहे. पानशेत ९२ टक्के भरले आहे. तसेच पाण्याची मोठ्या प्रमाणावर आवक धरणात होत आहे.

त्यामुळे पानशेत धरणातून सोमवारी मध्यरात्री ९ हजार ८२४ क्युसेकने पाणी सोडण्यास सुरुवात झाली. त्यानंतर विसर्ग वाढविण्यात आला. पहाटे चार वाजता पानशेत धरणातून १५ हजार १३६ क्युसेकने पाणी सोडण्यात येत आहे.

हे पाणी खडकवासला धरणात जमा होत आहे. हा विसर्ग आणि ओढ्या-नाल्याद्वारे जमा होणारे पाणी यामुळे खडकवासला धरणातून पाण्याचा विसर्ग वाढणार आहे. त्यानुसार १८ हजार ४९१ क्युसेकने पहाटे चार वाजता खडकवासला धरणातून पाणी नदीत सोडण्यात येत होते. त्यामध्ये वाढ करून सकाळी नऊ वाजता २२ हजार ८८० क्युसेक त्यानंतर दुपारी १२ वाजता २५ हजार क्युसेकने पाणी सोडण्यास सुरुवात झाली.