आपटाळे : जुन्नर तालुक्याच्या पश्चिम आदिवासी भागातील खटकाळे ग्रामपंचायतीच्या सरपंच पदाच्या निवडणुकीत माजी पंचायत समिती सदस्य काळू चिंधा गागरे यांना पराभवाचा धक्का सहन करावा लागला. या निवडणुकीत बाळू अप्पा केदारी यांनी बाजी मारली.

बाळू केदारी यांना 232 मते मिळाली तर प्रतिस्पर्धी उमेदवार काळू चिंधा गागरे यांना 155 मते, देवका नारायण मोरे यांना 101 मते, विक्रम रामभाऊ केदारी यांना 154 मते, तर नवनाथ गोपाळा मोरे यांना 118 मते मिळाली. माजी पंचायत समिती सदस्य काळू गागरे यांना पराभवाचा झटका बसल्याने आदिवासी भागातील राजकीय वर्तुळात चर्चाना उधाण आले आहे.

खैरे खटकाळे ग्रुप ग्रामपंचायतीच्या सात सदस्यांपैकी अश्विनी राजाराम केदारी, अश्विनी भागू बोऱ्हाडे हे उमेदवार बिनविरोध निवडून आले तर उर्वरित पाच जागांसाठी दहा उमेदवार रिंगणात होते.

या लढतीत तान्हाजी चिमाजी घोईरत, तुकाराम पांडुरंग मोडक, सुरेखा भरत मोडक, दिलीप रामचंद्र मोरे, बेबी शशिकांत गागरे हे उमेदवार विजयी झाले. विजयी उमेदवारांच्या कार्यकर्त्यांनी व ग्रामस्थांनी मतदान केंद्रा बाहेर जल्लोष करत विजयाचा आनंद साजरा केला. विजयी उमेदवारांचे गावात जल्लोषात स्वागत करण्यात आले.