कात्रज : पद्मावती येथे रविवारी (ता. १४) दुपारी तीन वाजण्याच्या सुमारास एका चारचाकी वाहनाला आग लागल्याची घटना घडली. पद्मावती येथे विणकर सभागृहाजवळ रस्त्यावर उभ्या असलेल्या चारचाकी वाहनाने पेट घेतल्याची वर्दी मिळताच कात्रज अग्निशमन केंद्र (Katraj Fire Brigade Station) येथून अग्निशमन वाहन रवाना करण्यात आले.

घटनास्थळी पोहोचताच जवानांनी पाहिले की, रस्त्यावर उभ्या असलेल्या वाहनाच्या पुढील भागाकडे आगीच्या ज्वाळा दिसत होत्या, तर मागील बाजूस इंधनाची ही गळती होत असल्याचे पाहून त्यांनी तातडीने आगीवर पाण्याचा मारा सुरू करत फोमचा वापर करुन सुमारे दहा मिनिटात पूर्ण आग आटोक्यात आणत धोका दूर केला.

सदर वाहन हे फोर्ड कंपनीचे असून डिझेल वापरातील आहे. या घटनेत सुदैवाने कोणीही जखमी झाले नाही. या कामगिरीत अग्निशमन अधिकारी प्रदिप खेडेकर, वाहनचालक गणेश भंडारे, फायरमन पंकज इंगवले, निलेश राजीवडे, अभिषेक खाटपे, योगेश कुंभार, विनायक घागरे यांनी सहभाग घेतला.