पुणे - मुंढवा परिसरात एकाने चार वर्षांच्या मुलीवर अत्याचार केल्याचा धक्कादायक प्रकार उघडकीस आला आहे. रविवारी (ता. १३) घोरपडीतील लोहमार्गाजवळ त्याने बालिकेवर अत्याचार केला आहे. अत्याचार करणाऱ्याला मुलीच्या आर्इने भाऊ मानलेला होता. त्यामुळे त्याचे सतत मुलीच्या घरी येणे -जाणे होते.

या प्रकरणी मुंढवा पोलिसांनी एकाविरुद्ध बालकांचे लैंगिक अत्याचारापासून संरक्षण कायद्यान्वये (पोक्सो) गुन्हा दाखल केला आहे.

याबाबत एका महिलेने मुंढवा पोलिस ठाण्यात फिर्याद दिली आहे. महिलेने दिलेल्या फिर्यादीनुसार एका ३५ वर्षीय तरुणाविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार महिलेने आरोपीला भाऊ मानले होते. त्याचे महिलेच्या घरी नेहमी येणे-जाणे होते.

रविवारी सकाळी महिला आणि तिचे पती घरात नव्हते. घरात कोणी नसल्याची संधी साधून आरोपी मुलीला घरातून बाहेर घेऊन गेला. त्यावेळी मुलीची मोठी बहीण घरात होती. तिने त्याला विरोध केला. त्यानंतर त्याने घोरपडीतील लोहमार्गाजवळ बालिकेवर अत्याचार केला.

मुलीने हा प्रकार घरी सांगितल्यानंतर आरोपीवर गुन्हा दाखल करण्यात आला आहे.

या घटनेची माहिती पोलिसांना समजताच मुलीला तातडीने ससून रुग्णालयात वैद्यकीय तपासणीसाठी पाठविण्यात आले. बालिकेवर अत्याचार करून आरोपी पसार झाला असून, त्याला पकडण्यासाठी पोलिसांची पथके रवाना करण्यात आली आहे. वरिष्ठ पोलिस निरीक्षक निळकंठ जगताप यांच्या मार्गदर्शनाखाली तपास करण्यात येत आहे.