पुणे, ता. २८ ः पुणे शहरात तिघांना झिकाची लागण झाल्याचे समोर आले होते. आता मुंढवा भागात एका तरुणाला झिकाचा संसर्ग झाल्याचे समोर आले आहे. त्याची तब्येत चांगली असल्याचे महापालिका प्रशासनातर्फे सांगण्यात आले आहे. दरम्यान झिकाचा प्रतिबंध करण्यासाठी महापालिकेने एरंडवणे, मुंढवा भागात संशयित रुग्णांचे सर्वेक्षण सुरु केले आहे. आठ जणांचे रुग्णांचे रक्ताचे नमुने तपासणीसाठी प्रयोगशाळेकडे पाठविण्यात आले आहेत.
एरंडवणे येथे झिकाचे दोन रुग्ण आढळले तर मुंढवा भागात एका रुग्णाची नोंद झाली आहे. खासगी रुग्णालयाने ही माहिती महापालिकेला कळविण्यास विलंब केला, त्यामुळे त्या रुग्णालयास कारणे दाखवा नोटीस बजावण्यात आली आहे.
मुंढवा येथील महिलेला झिका झाल्याने त्यांच्या संपर्कात असलेल्या मुलाचे रक्ताचे नमुने राष्ट्रीय विषाणू विज्ञान संस्थेकडे तपासणीसाठी पाठविले होते. त्यामध्ये त्याला झिकाची लागण झाल्याचे स्पष्ट झाले आहे. त्याची प्रकृती चांगली असल्याचे प्रभारी आरोग्य प्रमुख डॉ. कल्पना बळिवंत यांनी सांगितले.
झिकाचा प्रतिबंध करण्यासाठी महापालिकेच्या आरोग्य विभागाने सर्वेक्षण सुरू केले आहे. एरंडवणे येथे दोन रुग्ण आढळल्याने परिसरातील खिलारवाडी, गणेशनगर, सिंहगड रस्ता भागात २ हजार ४२२ नागरिकांचे सर्वेक्षण केले, यामध्ये पाच गर्भवती मातांचे व तीन संशयित रुग्णांचे रक्ताचे नमुने तपासणीसाठी राष्ट्रीय विषाणू विज्ञान संस्थेकडे पाठवले आहेत. त्यांचा अहवाल अद्याप प्राप्त झालेला नाही. २ हजार ४७३ घरांचे अळी सर्वेक्षण केले. त्यात ७९ घरांमध्ये डासांच्या अळ्या आढळून आल्या. तसेच पाच हजार ४४ पाणीसाठ्याची तपासणी केली. त्यामध्ये १३५ ठिकाणी डासांच्या आळ्या आढळल्या.
मुंढव्यातील २ हजार ८९ नागरिकांचे सर्वेक्षण केले. तर १ हजार ५० घरांमध्ये अळी सर्वेक्षण केले. त्यापैकी ४९ ठिकाणी आळी आढळली. एकूण ३ हजार ५२३ पाणी साठ्याचे सर्वेक्षण केले, त्यापैकी ७३ ठिकाणी डासांच्या अळ्या आढळून आल्या. या सर्व भागात औषध फवारणी करण्यात आली आहे, अशी माहिती महापालिकेतर्फे देण्यात आली.
खासगी रुग्णालयात डेंगी, झिका, चिकुनगुनिया अशा आजारांचे रुग्ण उपचारासाठी आल्यानंतर त्याचं माहिती त्वरित महापालिकेच्या आरोग्य विभागाला देण्यात यावी. माहिती देण्यास टाळाटाळ करू नये अशी सूचना महापालिकेने खासगी रुग्णालयांना केली आहे.
- संपूर्ण शरीर झाकले जाईल असे कपडे घालावेत
- डास चावू नयेत यासाठी शरीराला क्रीम लावावी
- मच्छरदाणीचा वापर करा, डासांना रोखण्यासाठी उपाययोजना करावी
- फ्रिज, कुलर, झाडांच्या कुंड्यांमध्ये पाणी साचू देऊ नये
- प्लॅस्टिकचे कप, नारळाच्या कवट्या, टायरमध्ये पाणी साचून देऊ नये
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.