पिंपरी - शहरात एकीकडे स्वच्छ भारत अभियान राबविले जात असताना, दुसरीकडे रस्त्यांलगत व मोकळ्या जागांमध्ये राडारोडा टाकण्याचे प्रमाण वाढले आहे. शहरातील काही मुख्य रस्त्यांसह अंतर्गत रस्त्यांवरही असे चित्र दिसत असून, ट्रॅक्‍टर, डंपर अशा वाहनांमधून राडारोडा टाकताना उडणाऱ्या धुळीचा पादचारी व दुचाकीस्वारांना सर्वाधिक त्रास होत आहे.

केंद्र सरकारच्या स्वच्छ भारत अभियानांतर्गत महापालिकेतर्फे शहरात स्वच्छता मोहीम राबविली जात आहे. केंद्रीय पर्यावरण, वन व हवामान मंत्रालयाच्या अधिसूचनेनुसार शहरात घनकचरा व्यवस्थापन नियम लागू झाले आहेत. त्याअंतर्गत महापालिकेने कार्यवाही सुरू केली आहे. 

रस्त्यांवर राडारोडा टाकणाऱ्यांवर दंडात्मक कारवाई केली जात आहे. मात्र, या कारवाईला न जुमानता अनेक जण अद्यापही बांधकामाचा राडारोडा ट्रॅक्‍टर, डंपर, टेम्पो अशा वाहनांतून आणून जागा मिळेल तेथे टाकत आहेत. वाहनांमधून राडारोडा टाकताना उडणारी धूळ पादचारी व दुचाकीस्वारांना त्रासदायक ठरत आहे.

केंद्र व राज्य सरकारच्या घनकचरा व्यवस्थापन नियमानुसार रस्त्यावर घाण करणे, राडारोडा टाकणे गुन्हा आहे. त्यानुसार शहरातील रस्त्यांवर घाण करणारे व राडारोडा टाकणाऱ्यांवर दंडात्मक कारवाई केली जात आहे. 
- दिलीप गावडे, अतिरिक्त आयुक्त, महापालिका

येथे टाकला जातोय राडारोडा
 पिंपळे निलख- बाणेर रस्त्यालगत मुळा नदीलगतचा परिसर
 पिंपरीतील अजमेरा कॉलनी डब्ल्यू सेक्‍टर ते मोरवाडी कोर्ट रस्ता
 आकुर्डी स्टेशन ते चिंचवड स्टेशन लोहमार्गालगतचा नवीन रस्ता
 पुणे-नाशिक महामार्गालगत नाशिक फाटा ते मोशीदरम्यानचा पट्टा
 भोसरी वखार महामंडळ ते वडमुखवाडी अलंकापुरम रस्ता
 शंकरवाडी- कासारवाडी ते सुदर्शननगर पवना नदीलगतचा रस्ता
 भोसरी व मोशी प्राधिकरणातील अंतर्गत रस्ते
 प्राधिकरणातील निगडी- भोसरी स्पाइन रोडचा सेवारस्ता
 भोसरी- नेहरुनगर- पिंपरी रस्ता
 एमआयडीसीतील अंतर्गत रस्ते