मंचर - आदर्शगाव गावडेवाडी (ता. आंबेगाव) येथे विधवा प्रथा संपुष्टात आणण्यासाठी २५ विधवा महिलांची खणा-नारळाने ओटी भरण्यात आली. त्यांना हळदी-कुंकूवाचा सन्मान देण्यात आला. अनेक वर्षानंतर कपाळावर हळद-कुंकू लाऊन मिळालेल्या सन्मानाने महिलांचा आनंद द्विगुणीत झाला. यापुढे संबंधित महिलांच्या हस्तेच अनेक शुभ कार्य करण्याचा, त्यांना सक्षम महिला म्हणण्याचा व पतीच्या निधनानंतर बांगड्या न फोडण्याचा ठराव महिलांच्या ग्रामसभेत मंजूर करण्यात आला. या निर्णयाची प्रभावीपणे अंमलबजावणी केली जाईल अशी घोषणा सरपंच स्वरूपा ऋषिकेश गावडे यांनी केली. त्यांच्या या निर्णयाचे उपस्थितांनी उत्स्पुर्तपणे टाळ्या वाजवून स्वागत केले.

'प्रजासत्ताक दिनानिमित्त गुरुवारी (ता. २६) स्वरूपा गावडे यांच्या अध्यक्षतेखाली ग्रामसभा झाली. यावेळी ग्रामसेविका दिपाली थोरात, उपसरपंच योगिता गावडे, मुख्याध्यापिका शशिकला चिखले, सदस्या मंदा गावडे, प्रियांका गावडे, मंगल गावडे, स्नेहल गावडे, ज्योती गायकवाड, मीना सोपानराव निघोट उपस्थित होत्या.

हळदी कुंकवाचा कार्यक्रम हा प्रत्येक महिला वर्गाचा आवडता कार्यक्रम आहे. यासाठी महिला नटून थटून आवर्जून आल्या होत्या. मीना निघोट यांच्यासह अनेक महिलांच्या डोळ्यातून आलेले आनंदाश्रू पाहून अन्य महिलाही भारावून गेल्या.

यासंदर्भात सरपंच स्वरूपा गावडे म्हणाल्या, 'महाराष्ट्र शासनाने विधवा प्रथा बंद करण्याचा निर्णय जाहीर केला असून यापुढे विधवा महिलांना प्रत्येक गावात सन्मानपूर्वक वागणूक द्या. असे आदेश काढले आहेत. यापुढे विधवा शब्द न वापरता सक्षम महिला असा शब्द वापरला जाईल. सनातन विचारांना फाटा दिला जाईल. यापुढे पतीचे निधन झाल्यास बांगड्याही फोडल्या जाणार नाहीत.'