घोडेगाव - गंगापुर बुद्रुक (ता. आंबेगाव) येथे एका शेतकऱ्याने शेतपिकाच्या नुकसानीपासून बचाव व्हावा यासाठी लावलेल्या जाळीत आज (ता. ६) पहाटे बिबटया अडकला. जुन्नर येथील माणिकडोह बिबट निवारा केंद्रातील डॉक्टर व रेस्क्यू टीमने दुपारी एकच्या दरम्यान बिबट्याला बेशुद्ध करून निवारा केंद्रात नेले आहे.

बिबट्या जाळीत अडकल्यानंतर पहाटे त्याच्या ओरडण्याच्या आवाजाने ही गोष्ट ग्रामस्थांच्या लक्षात आली. त्यांनी त्वरीत घोडेगाव वनविभाग व रेस्क्यु टिमला कळवली. घोडेगाव वनविभागाचे वनपरिक्षेत्र अधिकारी एम .बी .गारगोटे यांनी त्वरित दखल घेऊन बिबट्याला रेस्क्यू टीमच्या साह्याने बेशुद्ध करून ताब्यात घेतले. त्यांनी गंगापूर बुद्रुक व परिसरातील गावांमध्ये धुमाकूळ घातला होता. शेळ्या, मेंढ्या ,कुत्री यांच्यावर हल्ला करून नुकसान केले होते.

काही दिवसांपूर्वी बिबटया ज्या जाळीत अडकला त्या ठिकाणपासून पन्नास फुट अंतरावर एका लहान कालवडीवर हल्ला केला होता. त्यावेळीपासून नागरिक शेतात जाताना घाबरत होते. आता बिबटया पकडला गेल्याने नागरिकांनी सुटकेचा निश्वास सोडला आहे. या अडकलेल्या बिबटयाला पाहण्यासाठी नागरिकांनी मोठया प्रमाणात गर्दी केली होती.

दरम्यान बिबटयाला पकडण्यासाठी बेशुध्द करावे लागणार होते. त्यासाठी जुन्नर हून रेस्क्यू टीम येणार होती. बिबटया पकडण्यास आलेल्या टीमने वनविभाग व रेक्यु टीमच्या मदतीने दुपारी १ च्या सुमारास बिबटयाला जेरबंद केले. या परीसरामध्ये अजून दोन ते तीन बिबटे असल्याची भिती गावकरी व्यक्त करत आहेत. त्यामुळे हे बिबटे पकडावे अशी मागणी होत आहे.