पिंपरी - आरटीई प्रवेशांतर्गत ऑनलाइन फॉर्म भरताना ‘गुगल’वर घराचा पत्ता चुकीचा दर्शविला जात असल्याने पालकांनी अर्ज ‘कन्फर्म’ करताना पत्ता योग्य असल्याची खात्री पालकांनी करावी. अन्यथा पाल्यांना प्रवेश मिळण्यास अडसर निर्माण होण्याची शक्‍यता निर्माण झाली आहे.

आरटीईअंतर्गत प्रवेशासाठी ऑनलाइन अर्जामध्ये शाळांची निवड करताना तीन किलोमीटरच्या आतील शाळा निवडणे बंधनकारक आहे. मात्र अर्ज करताना ‘गुगल पत्ता’ या रकान्यात शहरातील ठराविक ठिकाणांची नावे येत नाहीत. विद्यार्थ्यांचे शाळेपासूनचे घरापर्यंतचे अंतर गुगल मॅपने निश्‍चित केले असल्याने भौगोलिक परिस्थितीनुसार तफावत येत असल्याची शक्‍यता आहे.

त्यामुळे पालकांना ‘लोकेशन सिलेक्‍ट’ करणे कठीण जात असून, गुगल मॅपवरील अंतरामध्ये अक्षांश व रेखांश चुकीचा दिल्यामुळे पत्त्याचे ठिकाण जुळत नाही. सरकारकडून अर्जाची गुगल पडताळणी (व्हेरिफिकेशन) अट लागू केली आहे. 

या पडताळणीमध्ये चुकीचा पत्ता दाखविल्यावर पाल्यांचा अर्ज बाद होऊ शकतो. ज्या पालकांकडून अनवधानाने अर्जामध्ये चुकीचा पत्ता दाखविला असेल, त्यांनी महापालिका प्रशासनाकडे दुरुस्तीसाठी विनंती अर्ज करावा. 

याबाबत आरटीई पालक संघाचे अध्यक्ष हेमंत मोरे म्हणाले, ‘‘तांत्रिक अडचणींमुळे चुकीचा पत्ता नोंद होत असल्यामुळे प्रवेश प्रक्रियेत बाधा येण्याची शक्‍यता आहे. गुगलवरील पत्ता दुरुस्त करून मिळण्याबाबत शिक्षण विभागाकडे अर्ज केला आहे.

गुगल मॅपवरून पत्ता चुकत असल्याबाबत काही पालकांच्या तक्रारी आल्या आहेत. याबाबत पालकांकडून दुरुस्तीबाबतचे विनंती अर्ज घेत आहोत.
- हैबती मोरे, आरटीई समन्वयक, महापालिका