उंड्री - दोन गोदाम आणि एका गॅरेजला आग लागण्याची घटना हांडेवाडी येथील हांडे लॉन्सच्या मागे मंगळवारी चार वाजण्याच्या सुमारास घडली. सुदैवाने आगीमध्ये कोणतीही जीवित हानी झाली नाही.

येथील पुटयाचे, हार्डवेअरचे गोदाम आणि गॅरेजला चार वाजण्याच्या सुमारास आग लागली. कागदाचे गोदाम असल्याने आग वाढतच होती. नागरिकांनी अग्निशामक दलाला फोन केल्यावर काळेपडळ, हडपसर, कोंढवा, कात्रज या ठिकाणावरील अग्निशामकदलाच्या मिळून एकूण आठ गाड्या त्वरित घटनास्थळी पोहचल्या.

आग आटोक्यात आणण्यासाठी एक तासाचा कालावधी लागला मात्र संपूर्ण आग थंड करण्याचे काम जवळपास तीन तास सुरु होते. आगीचे नेमके कारण समजू शकले नाही, असे काळेपडळ अग्निशामक दलाचे कर्मचारी सचिन आव्हाळे यांनी सांगितले.