बारामती - विजांचा लखलखाट व ढगांचा गडगडाटासह बारामतीत मुसळधार पाऊस कोसळत असून या पावसाने काहीसा दिलासा मिळण्याची शक्यता निर्माण झाली आहे. तालुक्याच्या अनेक भागात दुपारनंतर ढगफुटीसदृश पाऊस कोसळल्याने अनेक ठिकाणी शेताच्या ताली फुटून पाणी वाहत असल्याचे दृश्य पाहायला मिळाले.
काही मिनिटातच पाण्याची तळी साचून पाणी वाहू लागल्याने व पावसाचा जोर कायम असल्याने हा ढगफुटीसदृश पाऊस असल्याचेच बारामतीकरांचे म्हणणे होते. दुपारी साडेचारच्या सुमारास अंधारुन आले आणि जोरदार पावसास प्रारंभ झाला. पावसाचा जोर इतका होता की काही मिनिटात रस्त्यांवरुन पाणी वाहू लागले. शहरातील सर्व सखल भागात पाण्याची मोठी तळी साचली आहेत.
आज पावसाचा जोर जसा होता तसाच ढगांचा गडगडाट व विजांचा लखलखाट देखील होता. अनेकदा तर ढगांच्या प्रचंड आवाजाने बारामती शहर हादरत होते. पावसाचा जोरही कमालीचा असल्याने रस्त्यावरील वाहतूक थंडावली होती. ग्रामीण भागात अनेक ठिकाणी पिकांचे मोठे नुकसान झाले असून उस, डाळींब व भाजीपाला पिकांचे प्रामुख्याने मोठे नुकसान झाले आहे.
आज रविवार असल्याने कार्यालय व शाळांना सुटी असल्याने लोक घरातच असल्याने पावसात भिजण्याची वेळ आली नाही. यंदाच्या पावसाळयातील बारामतीत पडलेला हा पहिला दमदार पाऊस आहे. अशाच भीजपावसाची बळीराजाला प्रतिक्षा आहे.
पावसाने ओढ दिल्याने बारामतीतील खरीप हंगाम हातचा निघून गेला आहे, या पावसावरच रब्बीच्या पिकांचे जीवदान अवलंबून असल्याने हा पाऊस बारामतीसाठी महत्वाचा आहे. ओढे नाले भरुन वाहतील अशा दमदार पावसाची बारामतीकरांना अपेक्षा आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.