पुणे : चांदणी चौकातून कोकणात जाणारा राष्ट्रीय महामार्ग ५ ऑगस्टपर्यंत वाहतुकीसाठी बंद करण्यात आला आहे. जिल्हाधिकारी डॉ. सुहास दिवसे यांनी याबाबत आदेश जारी केले आहेत. नागरिकांच्या सुरक्षेच्यादृष्टीनं हा निर्णय घेण्यात आल्याचं त्यांनी सांगितलं आहे.

चांदणी चौकातून कोकणात जाणाऱ्या राष्ट्रीय महामार्गावर आदरवाडी आणि डोंगरवाडी (ता. मुळशी) या घाट परिसरातील रस्त्याला अतिवृष्टीमुळं एका बाजूनं तडा गेल्यानं रस्ता खचला आहे. त्यामुळं नागरिकांची सुरक्षितता तसंच दुर्घटना टाळण्यासाठी पाच ऑगस्टपर्यंत हा रस्ता वाहतुकीसाठी बंद करण्याचे आदेश जिल्हाधिकारी डॉ. सुहास दिवसे यांनी दिले आहेत.

दरम्यान, मुळशी तालुक्यात गेल्या दोन आठवड्यांपासून अतिवृष्टी होत आहे. अतिमुसळधार पावसामुळं रस्त्याला ठिकठिकाणी तडे गेले आहेत. पिरंगुट घाटात जागोजागी दरडीही कोसळल्या आहेत. चांदणी चौकातून कोकणाकडे जाणाऱ्या राष्ट्रीय महामार्गावर भुगाव, भुकुम, पिरंगुट, शिंदेवाडी या परिसरामध्ये महामार्गावर गुडघाभर पाणी साचते, त्यामुळं हे अपघातप्रवण क्षेत्र निर्माण होत आहे.