पिंपरी - हिंजवडीतील वाहतूक सुरळीतपणे सुरू राहण्यासाठी राबविण्यात येणारा चक्राकार वाहतुकीचा प्रयोग आता कायमस्वरूपी राबविण्यात येणार आहे. पोलिसांनी यासंदर्भातील अंतिम आदेश २७ नोव्हेंबर रोजी काढला आहे. हिंजवडीतील शिवाजी चौक ते विप्रो सर्कल फेज एक ते जॉमेट्रिक सर्कल चौक ते शिवाजी चौक या भागातील वाहतूक विनाअडथळा व्हावी, यासाठी चक्राकार वाहतूक सुरू करण्यात आली आहे. 

पोलिसांनी सप्टेंबर महिन्यापासून या भागात चक्राकार वाहतुकीचा प्रयोग राबविण्यास सुरवात केली होती. आतापर्यंत त्याला चारवेळा मुदतवाढ देण्यात आली. चक्राकार वाहतुकीमध्ये शिवाजी चौकातून उजवीकडे वळण्यास आणि यू टर्न घेण्यास सर्व प्रकारच्या वाहनांना मनाई करण्यात आली आहे. शिवाजी चौकात येणाऱ्या आयटी कंपन्यांच्या बसेस आणि अन्य जड वाहनांना वाकडकडे जाण्यासाठी कस्तुरी चौकात उजवीकडे वळून इंडियन ऑइल चौकातून जावे लागणार आहे. जांभूळकर जिम, शेल पेट्रोल पंपाजवळील दुभाजक स्थानिक नागरिकांना वाहतुकीसाठी कायमस्वरूपी खुला ठेवण्यात येणार आहे. 

जॉमेट्रिक सर्कल ते विप्रो सर्कल फेज दोनदरम्यानचे सर्व दुभाजक, शिवाजी चौक ते फेज एक सर्कलमधील पाच दुभाजक, फेज एक चौक ते जॉमेट्रिक सर्कल चौका दरम्यानचे सर्व दुभाजक आणि मेगा नाईन चौक ते शिवाजी चौकादरम्यानचे सर्व दुभाजक बंद करण्यात येणार आहेत. माणगाव रस्त्यावरून येणाऱ्या वाहनांना विप्रो सर्कल फेज एक चौकातून शिवाजी चौकाकडे सरळ जाण्यास प्रवेश बंद करण्यात आला आहे, असे अप्पर पोलिस आयुक्‍त मकरंद रानडे यांनी कळवले आहे.