कुरकुंभ : पुणे-सोलापूर राष्ट्रीय महामार्गावर (Pune-Solapur National Highway) दौंड तालुक्यातील मळद येथे रस्ता ओलांडणाऱ्या दुचाकीला पाठीमागून भरधाव वेगात येणाऱ्या लक्झरी बसणे धडक दिल्याने दुचाकीवरील पती-पत्नी दोघेही जागीच ठार झाले. हा अपघात रविवारी (ता. २७) सकाळी दहाच्या सुमारास घडला.

मळद येथील दत्तात्रय गंगाधर यादव व त्यांची पत्नी सुमन यादव हे पुणे-सोलापूर राष्ट्रीय महामार्गावरून जात असताना घागरेवस्ती जवळील दुभाजकाच्या ठिकाणी रस्ता ओलांडत होते. त्यावेळी पाठीमागून सोलापूर बाजूकडून येणाऱ्या लक्झरी बसने (एमएच २४, एबी ५२००) जोरात धडक दिल्याने दत्तात्रय गंगाधर यादव व त्यांची पत्नी सुमन यादव यांचा गंभीर जखमी झाल्याने जागीच मृत्यू झाला.

यादव कुटुंब मुळचे खानदेशातील असून गेल्या काही वर्षांपासून मळद येथे स्थायिक झाले आहे. यादव कुटुंबीयांनी अत्यंत प्रतिकूल परिस्थितीत मुलगा रोहन याला उच्च शिक्षण घेण्यास प्रोत्साहन दिले. अपघातात मृत्यू झालेल्या सुमन यादव या दौंड पंचायत समिती माजी सदस्य बबनराव रणवरे यांच्या भगिनी तर दत्तात्रय गंगाधर यादव हे दाजी होत.