पुणे : पुण्यातील कॅबचा (ओला, उबर) प्रवास आता महागला आहे. कारण प्रादेशिक परिवहन प्राधिकरणाने (आरटीए) याचे नवीन दर ठरविले असून त्याची एक जानेवारीपासून अंमलबजावणीस सुरवात झाली आहे. दर ठरविताना मुंबईतील एसी टॅक्सीच्या दराचा आधार घेण्यात आलेला आहे. पुण्यात पहिल्यादांच कॅबसाठी दर ठरविण्यात आले आहेत.

काळी-पिवळी टॅक्सीला पहिल्या १.५ किलोमीटरसाठी ३१ रुपये, त्यापुढील प्रत्येक एक किलोमीटरसाठी २१ रुपये तर वातानुकूलित टॅक्सीला (कुलकॅब) पहिल्या १.५ किलोमीटरसाठी ३७ रुपये व त्यापुढील प्रत्येक एक किलोमीटरसाठी २५ रुपये असा भाडेदर निश्चित करण्यात आला आहे. ‘आरटीओ’च्या माहितीनुसार पूर्वी असे दर नव्हते. मात्र प्रवाशांकडून कॅब चालक प्रतिकिलोमीटर १५ ते २० रुपये असे दर आकारत होते.

प्रवासीसेवा देणाऱ्या संबंधित कंपन्यांच्या चालकांनी ग्राहकांकडून कमी दर आकारत असल्याची तक्रार इंडियन गिग वर्कर्स फ्रंटचे अध्यक्ष डॉ. केशव क्षीरसागर यांच्याकडे केली होती. त्यानंतर पुण्यात गिग वर्कर्सचा एक दिवसीय संपही झाला. त्या पार्श्वभूमीवर जिल्हाधिकारी कार्यालयात बैठक घेण्यात आली. त्या बैठकीत दर ठरविण्याचा आदेश पुणे प्रादेशिक परिवहन विभागला देण्यात आला होता.

त्यानुसार पुणे आरटीओने खटुआ समितीच्या शिफारशीनुसार व सरकारी निर्णयातील तरतुदीनुसार दराचा अभ्यास केला. पुणे ‘आरटीए’समोर दरांचा प्रस्ताव मांडला. त्याला अध्यक्ष व जिल्हाधिकारी डॉ. राजेश देशमुख यांनी मान्यता दिली असल्याची माहिती प्रादेशिक परिवहन अधिकारी (प्रभारी ) संजीव भोर यांनी दिली आहे.