इंदापूर : इंदापूरचे तहसीलदार श्रीकांत पाटील यांच्यावर झालेल्या हल्ला (Indapur Tahsildar Shrikant Patil Attack) प्रकरणी इंदापूर पोलीस ठाण्यात पाच जणांविरोधात गुन्हा दाखल करण्यात आला होता. घटना घडल्यानंतर सात तासाच्या आत इंदापूर पोलिसांनी (Indapur Police) यापैकी तीन आरोपींना अटक केले होते. त्यांना आज शनिवार रोजी न्यायालयासमोर हजर केले असता, न्यायालयाने त्यांना पुढील तपासासाठी पाच दिवसांची पोलीस कोठडीत ठेवण्याचा आदेश दिला.

याबाबत अधिक माहिती अशी की, इंदापूरचे तहसीलदार श्रीकांत पाटील हे तहसील कार्यालयात त्यांच्या ड्युटीवर शासकीय वाहन (क्रमांक MH 42 AX 1661) मधून चालक मल्हारी मखरे यांच्यासह जुना सोलापूर-पुणे हायवे (Solapur-Pune Highway) रोडवरून शंभर फुटी रोडकडे संविधान चौकातून जात असताना अचानक काही इसमांनी पांढ-या रंगाची विना नंबरची काळ्या काचा असलेली स्कार्पिओ गाडी रोडला आडवी लावली.

त्यानंतर त्यांच्या हातातील लोखंडी रॉडने व लाल मिरची पावडर डोळ्यावर टाकून वाहनाच्या सर्व काचा फोडून दोघांना जिवे मारण्याचा प्रयत्न केल्याप्रकरणी इंदापूर पोलीस ठाण्यात शिवाजी किसन एकाड (रा. बाव्रसमळा इंदापूर), विकास नवनाथ देवकर (रा. सरडेवाडी ता. इंदापूर), पिन्या ऊर्फ प्रदीप कल्याण बागल, तेजस अनिल विर, माऊली ऊर्फ शुभम महादेव भोसेकर (तिघे रा. भाटनिमगाव ता. इंदापूर) व इतरांवर गुन्हा दाखल करण्यात आला.

यावरून सदर गुन्ह्याचे गांभीर्य ओळखून पोलीस अधीक्षक डॉ. पंकज देशमुख, अप्पर पोलीस अधीक्षक संजय जाधव, उपविभागीय पोलीस अधिकारी डॉ. सुदर्शन राठोड व पोलीस निरीक्षक सूर्यकांत कोकणे यांच्या मार्गदर्शनाखाली तपासाची चक्र फिरवीत सहाय्यक पोलीस निरीक्षक राजकुमार डूणगे, शिवाजी राऊत, प्रकाश पवार, विवेकानंद राळेभात, सहायक फौजदार प्रकाश माने, पोलीस हवालदार काशीनाथ नगराळे, लखन साळवे, विनोद रासकर, अमित यादव, सचिन बोराटे, पोलिस नाईक विष्णू केमदारणे.

तसेच सलमान खान, पोलिस शिपाई विशाल चौधर, गणेश ढेरे, सुहास शेळके, विनोद काळे, लक्ष्मण सूर्यवंशी यांची वेगवेगळी पथके नेमून सदर गुन्ह्यातील आरोपी पिन्या ऊर्फ प्रदीप कल्याण बागल, तेजस अनिल वीर, शुभम महादेव भोसेकर (तिघे रा. भाटनिमगाव) यांना मोठ्या शिताफिने अटक केली. त्यानंतर पकडलेल्या तीन आरोपींना इंदापूर न्यायालयात हजर केले असता, न्यायालयाने त्यांना पाच दिवसांची पोलीस कोठडी सुनावली आहे.