पुणे : संरक्षण संशोधन आणि विकास संस्थेच्या (डीआरडीओ) पुण्यातील संशोधन आणि विकास आस्थापना (आर ॲण्ड डीई) या प्रयोगशाळेचे संचालक आणि वरिष्ठ शास्त्रज्ञ डॉ. प्रदीप कुरुलकरने याने पाकिस्तानी हेराला पाठविलेली माहिती गोपनीय नाही.

ती सर्व माहिती सार्वजनिक संकेतस्थळांवर उपलब्ध आहे, असा दावा डॉ. कुरुलकर याचे वकील ॲड. ॠषीकेश गानू यांनी केला आहे. सर्वत्र उपलब्ध असलेली माहिती सुनावणी दरम्यान जनतेसमोर खुली झाल्यास देशाच्या सार्वभौमत्वाला आणि हिताला बाधा पोचेल, अशी स्थिती नाही.

त्यामुळे या प्रकरणाची सुनावणी इन कॅमेरा घेण्यात येवू नये, असे नमूद करीत ॲड. गानू यांनी ‘इन कॅमेरा’ सुनावणी घेण्यावर हरकत नोंदवली. डॉ. कुरुलकरने ‘ब्राह्मोस’ आणि ‘अग्नी’ अशा क्षेपणास्त्रांची दिलेली गोपनीय माहिती सार्वजनिक क्षेत्रात उपलब्ध नाही.

ही माहिती अत्यंत संवेदनशील आहे. सुनावणी दरम्यान ही माहिती जनतेसमोर खुली झाल्यास देशाच्या सार्वभौमत्वाला आणि हिताला बाधा पोचवू शकते. त्यामुळे या प्रकरणाची सुनावणी इन कॅमेरा घेण्यात यावी, अशी मागणी करणारा अर्ज सरकारी वकील विजय फरगडे यांनी २९ ऑगस्टला सादर केला होता. त्यावर सोमवारी (ता.४) झालेल्या सुनावणी दरम्यान ॲड. गानू यांनी युक्तिवाद केला. या प्रकरणाची पुढील सुनावणी आठ सप्टेंबरला होणार आहे.

गोपनीय कागदपत्रे मिळण्यासाठी बचाव पक्षाचा अर्ज

डॉ. कुरुलकर याच्याकडे केलेली चौकशी आणि तपासातून पुढे आलेली माहिती याचे गोपनीय कागदपत्रे दहशतवाद विरोधी पथकाने (एटीएस) न्यायालयात सादर केले आहेत. ही गोपनीय कागदपत्रे मिळावीत, असा अर्ज ॲड. गानू यांनी सोमवारी न्यायालयात केला. त्या अर्जावर सरकारी वकील फरगडे यांनी हरकत घेतली.

त्यासंदर्भातील लेखी म्हणणे (से) त्यांनी न्यायालयात सादर केले आहे. हे प्रकरण सध्या जामिन अर्जाच्या सुनावणीच्या टप्प्यावर आहे. पुढील सुनावणीच्या वेळेस कायदेशीर तरतुदींनुसार ही गोपनीय कागदपत्रे बचाव पक्षाला देण्यात येतील, असे न्यायालयात सादर करण्यात आलेल्या लेखी म्हणण्यात नमूद आहे.