वडगाव शेरी : संगणक अभियंता तरुण आणि तरुणीच्या अपघाताची, आरोपीला दिलेली व्हीआयपी ट्रीटमेंटची चौकशी करून आरोपीला जास्तीत जास्त कडक शिक्षा व्हावी, यासाठी कठोर कलमांचा वापर करावा, अशी मागणी करत आम आदमी पक्षाने आज येरवडा पोलिस ठाण्यात आंदोलन केले.

आम आदमी पक्षाचे शहराध्यक्ष सुदर्शन जगदाळे, कार्याध्यक्ष अजित फाटके, युवा शहराध्यक्ष अमित म्हस्के, मुकुंद किर्दत, किरण कद्रे आणि कार्यकर्ते, पदाधिकारी मोठ्या संख्येने उपस्थित होते. अपघातानंतर आरोपीला पोलिस ठाण्यात मिळालेली वागणूक आणि फिर्यादींना झालेला त्रास या गोष्टींचा निषेध व्यक्त करण्यात आला.

येरवडा पोलिस ठाण्याच्या पायऱ्यांवर बसून पक्षाच्या पदाधिकाऱ्यांनी विविध मागण्यांचे फलक हातात धरले आणि मागण्यांचे निवेदन पोलिस अधिकाऱ्यांना दिले. सुदर्शन जगदाळे म्हणाले, ‘‘पुण्यातील दोन आयटी अभियंत्यांचा दुर्दैवी मृत्यू दुर्घटना ही भाजपच्या नगरसेवक, आमदार, खासदार, मंत्री आणि गृहमंत्री यांच्या अवैध धंद्यातून निर्माण झालेली परिस्थिती आहे. पुण्यातील गुंडगिरी, पब, रेस्टोबार ही संस्कृती भाजपने वाढवली आहे. ’’

अजित फाटके म्हणाले, ‘‘पैशांच्या जोरावर आरोपींना वाचवण्यासाठी यंत्रणेने जी तत्परता दाखवली, ते वास्तव महाराष्ट्रासाठी, पुण्यासाठी घातक आहे.’’