कल्याणीनगरमधील अपघाताच्या घटनेनंतर मद्यपान करून वाहने चालविणाऱ्यांवर (ड्रंक अँड ड्राईव्ह) कारवाई करण्याबाबत पुणे पोलिस अजूनही ‘चिल्ड’ असल्याची स्थिती आहे. मद्यपी वाहनचालकांवर कारवाईचा इशारा दिल्यानंतरही प्रत्यक्षात अंमलबजावणी होत नसल्याचे वास्तव आहे. पोलिसांची रात्र गस्त, वाहनचालकांची तपासणी, भरारी पथके अजूनही पुरेशी ‘ॲक्टिव्ह’ झालेली नाहीत. शहरातील काही भाग, प्रमुख रस्ते वगळता अन्य ठिकाणी अजूनही रस्त्यांवर पोलिसांचा वावर कमी असल्याचे ‘सकाळ’ने गुरुवारी रात्री केलेल्या पाहणीत आढळून आले.

कल्याणीनगर, कोरेगाव पार्क, विमाननगरमध्ये पोलिसांकडून रात्री वाहनांची तपासणी केली जात आहे. ‘ड्रंक अँड ड्राईव्ह’ करणाऱ्यांवर काही प्रमाणात कारवाईदेखील केली जात आहे. मात्र उर्वरित प्रमुख रस्त्यांवर कोणत्याही प्रकारची तपासणी केली जात नसल्याची सद्यःस्थिती आहे.गणेशखिंड रस्ता, पुणे-मुंबई जुना महामार्ग, सेनापती बापट रस्ता, जंगली महाराज रस्ता, कर्वे रस्ता, छत्रपती शिवाजी महाराज रस्ता, सातारा रस्ता, बाजीराव रस्ता, नरवीर तानाजी मालुसरे रस्ता, सोलापूर रस्ता, स्वारगेट परिसर, पुणे स्टेशन, शिवाजीनगर, कोंढवा, कात्रज, लष्कर परिसर अशा बहुतांश भागात पोलिसांकडून रात्र गस्त, ड्रंक अँड ड्राईव्ह कारवाई होत नसल्याचे ‘सकाळ’ने गुरुवारी रात्री केलेल्या पाहणीत आढळून आले. डेक्कन, सारसबागसह अन्य भागांमधील चौपाटी रात्री उशिरापर्यंत सुरू होती.

काही भागांमध्ये पोलिसांकडून वाहने अडविली जात होती. वाहनचालकांची ब्रेथ अॅनलायझरद्वारे तपासणी केली जात होती. दांडेकर पुलाजवळील साने गुरुजी स्मारक, कलमाडी हाऊसजवळ, कर्वे रस्ता अशा काही ठिकाणी पोलिसांच्या मोबाईल व्हॅन, नळ स्टॉप चौक, फर्ग्युसन महाविद्यालय रस्त्यावरील नामदार गोपाळ कृष्ण गोखले चौक अशा काही ठिकाणी पोलिस दुचाकीवरून गस्त घालत होते. अनेक रस्त्यांवर मद्यपी तरुण दुचाकीवर ट्रिपल सीट जात होते.