पुणे : शहरातील मेट्रोच्या लोकार्पणासह विविध कार्यक्रमानिमित्त पंतप्रधान नरेंद्र मोदी हे रविवारी (ता.6) पुणे दौऱ्यावर येत आहेत. त्यानिमित्त रविवारी सकाळी दहा ते दुपारी दोन यावेळेत पौड रस्ता व कर्वे रस्ता वाहतुकीसाठी बंद ठेवण्यात येणार आहे. त्यामुळे वाहनचालकांनी पर्यायी मार्गांचा वापर करावा, असे आवाहन वाहतुक शाखेचे पोलिस उपायुक्त राहुल श्रीरामे यांनी केले आहे.

डेक्कन जिमखाना येथील खंडोजीबाबा चौक, कर्वे रस्ता आणि पौड रस्ता (शिवतीर्थनगर) येथील वाहतुक रविवारी सकाळी दहा ते दुपारी दोन पर्यंत बंद ठेवण्यात येणार आहे. त्यामुळे या मार्गावरुन जाणाऱ्या वाहनचालकांनी पर्यायी मार्गाचा वापर करावा. वाहतुकीतील बदल व पर्यायी मार्ग खालीलप्रमाणे ः

* गरवारे कॉलेज ते आनंदनगर मेट्रो जंक्‍शन येथील मुख्य कार्यक्रमामुळे खंडोजीबाबा चौक येथुन पौड रस्त्यावरील शिवतीर्थनगरपर्यंत जाणारी वाहतूक बंद ठेवण्यात येणार आहे.

- पर्यायी मार्ग - कर्वे रस्त्यावरुन कोथरूडकडे जाणाऱ्या वाहनचालकांनी टिळक चौकातून लालबहादूर शास्त्री रस्ता, सेनादत्त पोलिस चौकी, म्हात्रे पूलमार्गे डीपी रस्त्याने कोथरूडकडे जावे किंवा दांडेकर पूल मार्गे डीपी रस्त्याने गुळवणी महाराज पथ, करिश्‍मा सोसायटीमार्गे इच्छितस्थळी जावे.

* पौड रस्त्यावरील शिवतीर्थनगरकडून खंडोजीबाबा चौकापर्यंत डेक्कनकडे जाणारी वाहतूकही बंद ठेवण्यात येणार आहे.

- पर्यायी मार्ग - शिवतीर्थनगरकडून डेक्कनकडे जाणाऱ्या वाहनांनी मयूर कॉलनी, निंबाळकर बाग, डीपी रस्ता किंवा गुळवणी महाराज रस्त्याने नदीपात्रातून डेक्कन जिमखाना किंवा सेनादत्त पोलीस चौकी, शास्त्री रस्त्यामार्गे इच्छितस्थळी जावे.