कसबा पोटनिवडणुकीसाठी सर्वच राजकीय पक्षांनी तयारी सुरू केली आहे. विविध संघटना, पक्षातल्या उमेदवारांनी अर्ज भरले आहेत. हिंदू महासंघाचे अध्यक्ष आनंद दवे यांनीही अर्ज भरला आहे. त्यानंतर त्यांनी आपली रणनीतीही सांगितली आहे.

उमेदवारी अर्ज भरल्यानंतर आनंद दवे यांनी माध्यमांशी संवाद साधला आहे. दवे म्हणाले, "आम्ही हिंदुत्वाची लढाई लढतोय. आम्हाला हिंदू समाजासाठी काम करतोय. त्याचा कोणावर काय परिणाम होतोय, याची हिंदू महासंघाने काळजी करण्याचं काहीच कारण नाही. उमेदवार जेव्हा निवडणूक लढतो, तेव्हा प्रत्येकाचा ठोकताळा असतो. त्यांना शुभेच्छा, पण हिंदू महासंघच निवडून येणार आहे".

या निवडणुकीतल्या रणनीतीबद्दल बोलताना आनंद दवे म्हणाले, "ही निवडणूक आम्ही गंभीरतेने आणि जिंकण्यासाठीच लढवत आहोत. आम्ही अर्ज मागे घेणारच नाही. माझा अजेंडा म्हणजे पुण्येश्वर मंदीर मुक्त करावं. हिंदूंवर झालेल्या अन्यायाविरोधात ज्यांना आवाज उठवायचा आहे, त्यांनी माझ्यासोबत यावं. आम्ही फक्त आणि फक्त हिंदूंच्या मतासाठी हिंदूंच्या घरात जाऊन प्रचार करणार आहे. "