पुणे, ता. १५ : जेवणाची चव न आवडल्यामुळे बांधकाम मजुराने आचाऱ्याच्या डोक्यात हातोड्याने वार करून त्याचा खून केला. तसेच, आरोपीने आणखी एका मजुराच्या डोक्यात हातोडा मारल्याने तोही जखमी झाला. ही घटना उंड्री परिसरातील एका गृहनिर्माण प्रकल्पाच्या लेबर कॅम्पमध्ये घडली.
भुवन सस्तीक सरकार (वय ६२) असे खून झालेल्या आचाऱ्याचे नाव आहे. या प्रकरणी कोंढवा पोलिसांनी रविवारी रात्री उशिरा गुन्हा दाखल केला आहे. कमल नारायण मारडी (वय ४९, रा. जलघर जियापुर, पश्चिम बंगाल) असे अटक केलेल्या आरोपीचे नाव आहे.
पोलिसांनी दिलेल्या माहितीनुसार, उंड्री परिसरातील महम्मदवाडी भागात रहेजा मिलेनियम गृहप्रकल्पाच्या लेबर कॅम्पमध्ये कॅन्टीन आहे.
रविवारी दुपारी दोन वाजण्याच्या सुमारास सरकार यांनी बांधकाम मजुरांसाठी जेवण तयार केले. परंतु जेवणाची चव न आवडल्याने मारडी आणि सरकार यांच्यात वाद झाला. त्यावर आरोपी मारडीने आचारी सरकार यांच्या डोक्यात आणि चेहऱ्यावर हातोड्याने वार केले. तसेच, रामप्रीत मंडल याच्याही डोक्यात हातोड्याने वार केला.
याबाबत माहिती मिळताच कोंढवा पोलिस ठाण्यातील वरिष्ठ निरीक्षक संतोष सोनवणे यांच्यासह पोलिस कर्मचाऱ्यांनी घटनास्थळी धाव घेतली. या घटनेत गंभीर जखमी झालेल्या सरकार यांचा रुग्णालयात उपचारादरम्यान मृत्यू झाला. या प्रकरणी कोंढवा पोलिसांनी रविवारी रात्री गुन्हा दाखल करून आरोपी मारडीला अटक केली.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.