मंचर - “राष्ट्रीय समाज पक्षाची सत्ता येण्यासाठी महाराष्ट्रातील ४८ लोकसभा मतदार संघात स्वबळावर निवडणूक लढवणार आहे. त्यामध्ये शिरूर व बारामती लोकसभा मतदार संघाचा समावेश आहे. सत्तेत आल्यानंतर मराठा, मुस्लीम व धनगर या समाजाला आरक्षणाचा प्रश्न दोन दिवसात मार्गी लावला जाईल.’ अशी ग्वाही राष्ट्रीय समाज पक्षाचे अध्यक्ष महादेव जानकर यांनी दिली.

राष्ट्रीय समाज पक्षाने जानकर यांच्या नेतृत्वाखाली काढण्यात आलेल्या रथ यात्रेचे शनिवारी (ता.१६) मंचर येथे सर्व जाती धर्माच्या कार्यकर्त्यांनी जोरदार स्वागत केले. यावेळी पत्रकारांशी बोलताना जानकर यांनी भारतीय जनता पक्ष व कॉंग्रेस पक्षावर टीका केली. ते म्हणाले “भारतीय जनता पक्ष व काँग्रेस पक्ष कधीही आरक्षण देणार नाही.

ते फक्त झुलत ठेवण्याचे काम गेली अनेक वर्ष करत आहेत. आम्ही भाजप बरोबर होतो. पण सध्या त्यांना लहान पक्षांची गरज वाटत नसल्याने देशातील विविध राज्यात रथ यात्रेच्या माध्यमातून पक्ष बळकटीकरण करण्याचे काम आम्ही सुरू केले आहे.

गावोगावी जनस्वराज्य यात्रेला उत्स्पुर्त प्रतिसाद मिळत आहे. आगामी लोकसभा निवडणुकीसाठी भाजप व इंडियाकडून निमंत्रण आल्यास विचार करू अन्यथा आमचा स्वबळाचा मार्ग मोकळा आहे. पक्ष संघाटना बांधणीचे काम मजबूत असून सर्व धर्मियांना या पक्षामध्ये प्राधान्याने स्थान दिले जाते.

त्यामुळे आम्हाला विचारल्याशिवाय राज्यात व देशात सत्ता स्थापन होऊ शकणार नाही. असे संख्याबळ आमच्याकड असेल याचे भान प्रस्थापित पक्षातील नेत्यांनी ठेवावे.”

यावेळी राष्ट्रीय समाज पक्षाचे राष्ट्रीय महासचिव सुशील कुमार, ज्ञानेश्वर सलगर, युवक अध्यक्ष अजित पाटील, समन्वयक सचिन गुरव, अॅड संजय माने, विनायक रुपनवर, सचिन लोंढे, भाऊसाहेब घोडे, योगेश धरम उपस्थित होते.

मंचर (ता.आंबेगाव): राष्ट्रीय समाज पक्षाचे अध्यक्ष महादेव जानकर यांच्या स्वागत प्रसंगी घोषणा देताना कार्यकर्ते.