फुलवडे : चौथ्या श्रावणी सोमवार निमित्ताने श्री क्षेत्र भीमाशंकर (bhimashankar) मंदिरात पहाटे ५ वाजता शिवलिंगाची विधिवत पूजा देवस्थान ट्रस्टच्या वतीने पार पडली. गाभाऱ्यात विविधरंगी फुलांनी सजावट करण्यात आली असून पूजा व महाआरती झाल्यानंतर मंदिर कोरोनाच्या (corona) साथरोग महामारीच्या पार्श्वभूमीवर भाविकांना दर्शनासाठी बंद ठेवण्यात आले आहे.

भीमाशंकर (bhimashankar) येथे भाविक व पर्यटक येऊ नयेत यासाठी तीन ठिकाणी पोलिस चेकपोस्ट उभारण्यात आली असून, भाविकांनी याठिकाणी येऊ नये. भगवान श्री. शंकराची घरातच पूजा, आराधना करून मंदिर व पोलिस प्रशासनास सहकार्य करण्याचे आवाहन भीमाशंकर देवस्थान ट्रस्टच्या वतीने करण्यात आले आहे. कोरोनाच्या पार्श्वभूमीवर मागील वर्षांपासून मंदिरे भाविकांना दर्शनासाठी बंद असल्याने या ठिकाणी भाविक येत नसल्याने येथील छोट्या-मोठ्या व्यावसायिकांचे मोठ्या प्रमाणावर नुकसान होत असून प्रशासनाने नियमांचे पालन करून मंदिरे दर्शनासाठी खुली करावीत अशी मागणी येथील व्यावसायिकांनी केली आहे.

श्री. क्षेत्र भीमाशंकर येथे चौथा श्रावणी सोमवार निमित्ताने कडक पोलिस बंदोबस्त ठेवण्यात आला असून भीमाशंकर, पालखेवाडी व डिंभे येथे पोलिस चेकपोस्ट उभारण्यात आली असून ३ ऑफिसर्स व ३५ पोलिस कर्मचारी तैनात ठेवण्यात आले आहेत. तरी भाविकांनी व पर्यटकांनी भीमाशंकर परिसरात प्रवेश करू नये अन्यथा दंडात्मक कारवाई करण्यात येईल असे आवाहन घोडेगाव पोलिस स्टेशनचे सहायक पोलिस निरीक्षक जीवन माने यांनी केले आहे.