पुणे : दारूच्या नशेत खिशातून पैसे काढून घेतल्याच्या रागातून बांबूने बेदम मारहाण केल्याने एका तरुणाचा मृत्यू झाला. ही घटना खराडी परिसरात राजाराम पाटीलनगर येथील फिनिक्स शाळेसमोर गुरुवारी (ता. ९) घडली.

किरण अशोक साठे (वय २४, रा. राजाराम पाटीलनगर, खराडी) असे मृत्युमुखी पडलेल्याचे नाव आहे. या प्रकरणी पोलिस उपनिरीक्षक गोरक्ष घोडके यांनी चंदननगर पोलिस ठाण्यात फिर्याद दिली आहे. त्यावरून लोकेश रवींद्र पाटील (वय २२, रा. पाटील वस्ती, केसनंद, ता. हवेली) याच्याविरुद्ध गुन्हा दाखल केला आहे.

लोकेश हा सराईत गुन्हेगार असून, त्याला अटक केली आहे. पोलिसांनी दिलेल्या माहितीनुसार, किरणने दारूच्या नशेत लोकेशच्या खिशातून गुपचूप पाचशे रुपये काढून घेतले. त्याचा राग मनात धरून लोकेशने किरणच्या डोक्यात बांबूने मारहाण केली. त्यात गंभीर जखमी झालेल्या किरणचा मृत्यू झाला. पुढील तपास सहायक पोलिस निरीक्षक एस.एम. खांडेकर करीत आहेत.