मंचर - आंबेगाव तालुक्यातील पिंपळगाव-खडकी ग्रामपंचायतच्या कार्यक्षेत्रातील मधला मळा येथे दीड वर्षाच्या बिबट मादीचा मृत्यू झाल्याची घटना घडली आहे. दोन बिबट्यांनी एकमेकांना हाणामारी केल्यामुळे जखमी झालेल्या बिबट मादीचा मृत्यू झाल्याचा प्राथमिक अंदाज वन खात्याकडून व्यक्त केला जात आहे.

जुन्नर वन विभागाचे सहाय्यक सहाय्यक संरक्षक अधिकारी संदीप शिंदे, मंचर वनपरिक्षेत्र अधिकारी कुणाल लिमकर, वनपाल शशिकांत मडके, वनपाल प्रदीपऔटी यांनी घटनास्थळी भेट देऊन पंचनामा केला आहे.

शेतकरी लहू गीताराम बांगर यांच्या शेतात सदर बिबट्या आढळून आला. त्यांनी मंचर वनपरिक्षेत्र कार्यालयाला सदर घटनेची माहिती कळवली. वन खात्यातील अधिकारी व कर्मचाऱ्यांनी घटनास्थळी भेट देऊन पंचनामा केला आहे. बिबट मादीचे शवविच्छेदन मंचर येथील पशुवैद्यकीय अधिकारी डॉ. अमित कोल्हे यांनी घटनास्थळी जाऊन केले.

मृत मादी बिबट्याच्या चेहऱ्यावर दुसऱ्या बिबट्याने पंज्याने हल्ला केल्याच्या खुणा स्पष्टपणे दिसत होत्या. हाणामारीत सदर मादी जखमी झाली. त्यातच तिचा मृत्यू झाल्याचा अंदाज वनपाल शशिकांत मडके यांनी व्यक्त केला आहे.

दरम्यान या भागात दोन ते तीन बिबट्यांचा वावर असून दिवसाही बिबट्यांचे दर्शन होते. अनेक कुत्र्यांचा फडशा बिबट्याने पाडला आहे

त्यामुळे वन खात्याने खबरदारीचा उपाय म्हणून या भागात तातडीने पिंजरे लावून बिबटे जेरबंद करावेत, अशी मागणी पुणे जिल्हा परिषदेचे माजी सदस्य मथाजी पोखरकर, उत्तम पोखरकर व गावकऱ्यांनी केली आहे.