मंचर - मराठा समाजाला आरक्षण मिळावे या मागणीसाठी मंचर (ता.आंबेगाव) येथील माजी सरपंच दत्ता गांजाळे गेली सहा दिवस आमरण उपोषणाला बसले होते. त्यांनी शुक्रवारी (ता. ३) दुपारी बारा वाजता उपोषण स्थगित केले. सरकारने दिलेल्या मुदतीत मराठा आरक्षणाचा प्रश्न मार्गी न लागल्यास पुन्हा आमरण उपोषण करावे लागेल.' असा इशारा गांजाळे यांनी दिला.

मंचर येथेछत्रपती शिवाजी महाराज चौकात राजमाता जिजाऊ प्रतिष्ठानचे संस्थापक अध्यक्ष अँड सुनिल बांगर, अंकुश लांडे पाटील, अजय घुले, वसंतराव बाणखेले यांच्या नेतृत्वाखाली गेली नऊ दिवस साखळी उपोषण सुरु होते. गेल्या सहा दिवसापासून गांजाळे यांनी आमरण उपोषण सुरु केले होते.

गुरुवारी (ता.२) रात्री मराठा समाज आरक्षणाचे नेते मनोज जरांगे पाटील यांनी उपोषण मागे घेतल्यानंतर शुक्रवारी साखळी उपोषणाची सांगता करण्यात आली.मंचर नगरपंचायतीचे मुख्य अधिकारी गोविंद जाधव, प्रांत कार्यालयातील नायब तहसीलदार सचीन मुंढे , सुनिल बांगर, मंचर पोलीस ठाण्याचे पोलीस निरीक्षक बलवंत मांडगे यांच्या हस्ते सरबत दिल्यानंतर गांजाळे यांनी उपोषण स्थगित केल्याचे जाहीर केले. यावेळी ‘एक मराठा लाख मराठा’ आदी घोषणा देण्यात आल्या.

यावेळी देवदत्त निकम, सुरेश भोर, प्रवीण मोरडे, संदीप बाणखेले, सुहास बाणखेले, सुरेश निघोट, गणेश खानदेशे मालती थोरात, अश्विनी शेटे, संगिता बाणखेले, राजश्री गांजाळे उपस्थित होते. सुनील बांगर, अकुश लांडे, वसंतराव बाणखेले, आशिष पुंगलिया यांची मनोगते झाली.