बारामती - येथील विविध संस्था व संघटना यांच्या सदस्यांनी दरवर्षी प्रमाणे यंदाही या स्पर्धेत सहभाग नोंदविला. दोन, अडीच व अडीच तासाहून अधिक अशा तीन प्रकारात होणारी मॅरेथॉन काही सदस्यांनी दोन तासांहूनही कमी वेळेत पूर्ण केली. अत्यंत नावाजलेल्या व आंतरराष्ट्रीय धावपटूंचा सहभाग असलेली ही मॅरेथॉन स्पर्धा प्रतिष्ठेची समजली जाते.

बारामतीकरही या स्पर्धेसाठी अनेक दिवस तयारी करतात. यात महिलांसह विविध घटकातील मान्यवरांचाही समावेश आहे. यंदा तीसहून अधिक बारामतीकर महिला उत्साहाने या मॅरेथॉनमध्ये सहभागी झाल्या होत्या.

दरवर्षी कमी वेळेत स्पर्धा पूर्ण करण्याचे आव्हान स्विकारुन उत्साही बारामतीकर या स्पर्धेत सहभागी होत असतात. दरवर्षी सातारा हिल मॅरेथॉनमध्ये सहभागी होणा-या बारामतीकरांची संख्या लक्षणीयरित्या वाढत आहे. फिटनेसप्रती जागरुकता निर्माण होत असल्याने व विविध ग्रुप दैनंदिन सकाळी फिटनेससाठी एकत्र येत असल्याने ही संख्या वाढू लागली आहे.